ശബരിമല: ചിങ്ങമാസ പൂജകൾക്കായി ശബരിമല ശ്രീധർമ്മശാസ്താ ക്ഷേത്രനട തുറന്നു. വൈകുന്നേരം അഞ്ച് മണിക്ക് തന്ത്രി കണ്ഠരര് ബ്രഹ്മദത്തന്റെ സാന്നിധ്യത്തിൽ മേൽശാന്തി ഇ.ഡി. പ്രസാദ് നടതുറന്ന് ശ്രീകോവിലിലെ ദീപങ്ങൾ തെളിയിക്കുകയായിരുന്നു. തുടർന്ന് പതിനെട്ടാം പടിക്ക് താഴെ അഗ്നി പകർന്നു.
ചിങ്ങം ഒന്നായ നാളെ പുലർച്ചെ അഞ്ച് മണിക്ക് ഭക്തർക്ക് ദർശനം നൽകാനായി വീണ്ടും നട തുറക്കും. ചിങ്ങം ഒന്നു മുതൽ വൈകുന്നേരങ്ങളിലെ ദീപാരാധനയ്ക്ക് ശേഷം പതിനെട്ടാം പടിയിൽ പ്രത്യേക പടിപൂജയും നടക്കും. ചിങ്ങമാസത്തെ പൂജകൾ പൂർത്തിയാക്കി ആഗസ്റ്റ് 21-ന് രാത്രി പത്ത് മണിക്ക് നടയടയ്ക്കും. തുടർന്ന് തിരുവോണ നാളുകളിലെ പ്രത്യേക പൂജകൾക്കായി ആഗസ്റ്റ് 24-ന് വൈകുന്നേരം ക്ഷേത്രനട വീണ്ടും തുറക്കുന്നതായിരിക്കും.
