ചെന്നൈ: ദീപാവലി രാത്രിയിൽ തമിഴ്‌നാടിന്റെ വിവിധ ഭാഗങ്ങളിൽ പോലീസ് സ്പെഷ്യൽ സബ് ഇൻസ്പെക്ടറും രണ്ട് കൗമാരക്കാരും ഐടി ജീവനക്കാരനും ഉൾപ്പെടെ കൊല്ലപ്പെട്ടു. തേനിയിൽ റീൽ ചിത്രീകരണത്തിനായി റോഡിന് നടുവിൽ പടക്കം പൊട്ടിച്ചത് തടഞ്ഞ സ്പെഷ്യൽ സബ് ഇൻസ്പെക്ടർ സെന്തിൽകുമാറിനെ അക്രമിസംഘം മർദ്ദിച്ചു കൊലപ്പെടുത്തുകയായിരുന്നു. ഗതാഗത തടസ്സമുണ്ടാക്കി പടക്കം പൊട്ടിക്കുന്നത് ഫോണിൽ പകർത്തി ഓഫീസിലേക്ക് അയച്ചതിനാണ് രാത്രി പത്തരയോടെ അദ്ദേഹത്തെ സംഘം ആക്രമിച്ചത്; തേനി ഗവൺമെന്റ് മെഡിക്കൽ കോളേജ് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.
തിരുച്ചിറപ്പള്ളി സമയപുരം ടോൾ പ്ലാസയ്ക്ക് സമീപം രാത്രി നടക്കാനിറങ്ങിയ ബന്ധുക്കളായ വിശാൽ (17), രാഹുൽ (17) എന്നിവരെ അജ്ഞാതസംഘം വെട്ടിക്കൊലപ്പെടുത്തി. വിശാൽ സംഭവസ്ഥലത്തും രാഹുൽ ആശുപത്രിയിലേക്കുള്ള വഴിമധ്യേയുമാണ് മരിച്ചത്. ചെന്നൈ ഇരുങ്ങല്ലൂരിൽ പടക്കം പൊട്ടിക്കുന്നതിനെച്ചൊല്ലിയുണ്ടായ തർക്കത്തിൽ സ്വകാര്യ ഐടി കമ്പനി ജീവനക്കാരനായ ക്രിസ്റ്റഫർ (20) എന്ന യുവാവിനെ ഇരുമ്പ് സ്പാനർ കൊണ്ട് കുത്തിക്കൊന്നു; സംഭവത്തിൽ ഒളിവിൽപ്പോയ മൂന്നുപേർക്കായി തിരച്ചിൽ നടക്കുകയാണ്. കടലൂരിലും ശിവഗംഗയിലും ഗുണ്ടാ നേതാക്കളും കൊല്ലപ്പെട്ടിട്ടുണ്ട്.
ഒറ്റ രാത്രിയിലെ കൊലപാതക പരമ്പര തമിഴ്‌നാട്ടിൽ ക്രമസമാധാനം തകർന്നതിന്റെ തെളിവാണെന്ന് ആരോപിച്ച് ഡിഎംകെ രംഗത്തെത്തി. മുഖ്യമന്ത്രി വിജയ് ഒരു 'ഡമ്മി സിഎം' ആണെന്നും ക്രമസമാധാന തകർച്ചയിൽ കണ്ണ് തുറക്കണമെന്നും പ്രതിപക്ഷ നേതാവ് ഉദയനിധി സ്റ്റാലിൻ വിമർശിച്ചു. സർക്കസ് ഭരണാധികാരികൾ ജനങ്ങളോട് മറുപടി പറയേണ്ട ദിവസം വിദൂരമല്ലെന്നും ഉദയനിധി വ്യക്തമാക്കി.
