ന്യൂഡൽഹി: അറസ്റ്റിലായി 48 മണിക്കൂറിലധികം ജുഡീഷ്യൽ കസ്റ്റഡിയിൽ കഴിയേണ്ടിവരുന്ന സർക്കാർ ജീവനക്കാരെ സസ്പെൻഡ് ചെയ്യപ്പെട്ടതായി കണക്കാക്കാമെന്ന് സുപ്രീം കോടതി ഉത്തരവ്. ഇത്തരം സാഹചര്യങ്ങളിൽ അധികാരികൾ പ്രത്യേകം സസ്പെൻഷൻ ഉത്തരവിറക്കേണ്ടതില്ലെന്നും കോടതി നിരീക്ഷിച്ചു. അഴിമതിക്കേസിൽ പ്രതിയായ ബിഹാറിലെ സമസ്തിപൂർ സദർ ആശുപത്രി മാനേജറുടെ ജാമ്യം പുനഃസ്ഥാപിച്ച് നവംബർ ആറിന് പുറപ്പെടുവിച്ച വിധിയിലാണ് ജസ്റ്റിസുമാരായ ജെ.ബി. പർദിവാല, മൻമോഹൻ എന്നിവരടങ്ങിയ ബെഞ്ചിന്റെ നിർണായക പരാമർശം.
പരാതിക്കാരന്റെ 36,421 രൂപയുടെ കുടിശ്ശിക അനുവദിക്കാൻ 4,000 രൂപ കൈക്കൂലി വാങ്ങിയെന്ന പരാതിയിലാണ് 1988-ലെ അഴിമതി നിരോധന നിയമപ്രകാരം ഇയാൾക്കെതിരെ കേസെടുത്തത്. അറസ്റ്റിലായി 15 ദിവസം ജയിലിൽ കഴിഞ്ഞ പ്രതിക്ക് സെഷൻസ് കോടതി ജാമ്യം അനുവദിച്ചെങ്കിലും, കൈക്കൂലിത്തുക ചെറുതാണെന്ന വാദം തള്ളി ഒരു വർഷത്തിന് ശേഷം പട്ന ഹൈക്കോടതി ജാമ്യം റദ്ദാക്കുകയായിരുന്നു. എന്നാൽ, മുൻകാല ക്രിമിനൽ പശ്ചാത്തലമില്ലാത്തതും കുറ്റത്തിന് ലഭിക്കാവുന്ന പരമാവധി ശിക്ഷയും കണക്കിലെടുത്ത് ഹൈക്കോടതി ഉത്തരവ് റദ്ദാക്കി സുപ്രീം കോടതി ജാമ്യം വീണ്ടും അനുവദിച്ചു. കൈക്കൂലിത്തുകയുടെ വലിപ്പച്ചെറുപ്പം ജാമ്യത്തിനുള്ള മാനദണ്ഡമല്ലെന്ന ഹൈക്കോടതി നിരീക്ഷണത്തോട് സുപ്രീം കോടതിയും യോജിച്ചു.
അതേസമയം, 15 ദിവസത്തോളം കസ്റ്റഡിയിൽ കഴിഞ്ഞിട്ടും ഉദ്യോഗസ്ഥന്റെ സസ്പെൻഷൻ പിൻവലിച്ച് അതേ ആശുപത്രിയിൽ അതേ പദവിയിൽ തന്നെ തിരികെ നിയമിച്ചതിൽ സുപ്രീം കോടതി കടുത്ത അതൃപ്തി വ്യക്തമാക്കി. സർവീസിൽ തിരിച്ചെടുത്ത നടപടി ഞെട്ടിപ്പിക്കുന്നതാണെന്നും ഇക്കാര്യം ബിഹാർ സർക്കാർ അടിയന്തരമായി പരിശോധിക്കണമെന്നും കോടതി നിർദ്ദേശിച്ചു.
