ഹൈദരാബാദ്: രാജ്യത്ത് അഴിമതി തടയാനും ദാരിദ്ര്യം നിർമ്മാർജ്ജനം ചെയ്ത് സമ്പദ്‌വ്യവസ്ഥയെ ശക്തിപ്പെടുത്താനും ലക്ഷ്യമിട്ട് 500, 2000 രൂപാ കറൻസികൾ പൂർണ്ണമായും പിൻവലിക്കണമെന്ന് ആന്ധ്രപ്രദേശ് മുഖ്യമന്ത്രി എൻ. ചന്ദ്രബാബു നായിഡു. 100, 200 രൂപാ നോട്ടുകൾ മാത്രം വിനിമയത്തിന് നിലനിർത്തി ഡിജിറ്റൽ കറൻസിയിലേക്കും സാങ്കേതികവിദ്യാധിഷ്ഠിത ഭരണത്തിലേക്കും രാജ്യം മാറണമെന്നാണ് അദ്ദേഹത്തിന്റെ നിർദ്ദേശം. 500, 1000, 2000 രൂപാ നോട്ടുകൾ പിൻവലിക്കണമെന്ന ആവശ്യം നേരത്തെ പ്രധാനമന്ത്രി നരേന്ദ്ര മോദിയുടെ മുൻപിൽ പലതവണ ഉന്നയിച്ചിട്ടുണ്ടെന്നും മുൻ റിപ്പോർട്ടുകളിൽ ശുപാർശ ചെയ്തിട്ടുള്ള ഈ കാര്യം വീണ്ടും ആവശ്യപ്പെടുമെന്നും നായിഡു വ്യക്തമാക്കി.

2016 നവംബർ എട്ടിന് കള്ളപ്പണവും അഴിമതിയും ഇല്ലാതാക്കാനെന്ന പേരിൽ കേന്ദ്രസർക്കാർ 500, 1000 രൂപാ നോട്ടുകൾ അസാധുവാക്കിയ ചരിത്രപരമായ നോട്ട് നിരോധനത്തിന് പത്താണ്ട് തികയുന്ന പശ്ചാത്തലത്തിലാണ് ടിഡിപി നേതാവിന്റെ ഈ പ്രതികരണം. സാങ്കേതികവിദ്യ കൃത്യമായി പ്രയോജനപ്പെടുത്തിയാൽ ഇതിന് ആനുപാതികമായി സാമ്പത്തിക രംഗത്ത് മുന്നേറ്റം ഉണ്ടാകുമെന്ന് അദ്ദേഹം ചൂണ്ടിക്കാട്ടി.

തിരഞ്ഞെടുപ്പ് രാഷ്ട്രീയത്തിൽ അടിസ്ഥാനപരമായ മാറ്റം വരണമെന്നും പണക്കൊഴുപ്പിന് പകരം ജനസേവനത്തെ അടിസ്ഥാനമാക്കിയാണ് മത്സരങ്ങൾ നടക്കേണ്ടതെന്നും ചന്ദ്രബാബു നായിഡു ആവശ്യപ്പെട്ടു. തിരഞ്ഞെടുപ്പുകളിൽ പണവിതരണം നിയന്ത്രിച്ച് പുതിയൊരു രാഷ്ട്രീയ സംസ്കാരത്തിന് എൻഡിഎ തുടക്കം കുറിച്ചിട്ടുണ്ടെന്നും, പ്രചാരണച്ചെലവുകൾ ചുരുക്കുന്നത് ജനപ്രതിനിധികളെ പൊതുജനങ്ങളോട് കൂടുതൽ ഉത്തരവാദിത്തമുള്ളവരാക്കി മാറ്റുമെന്നും അദ്ദേഹം പറഞ്ഞു.