ന്യൂഡൽഹി: ദീപാവലിക്കും കാളിപൂജയ്ക്കും പടക്കം പൊട്ടിക്കുന്നത് രോഗാണുക്കളെയും വൈറസുകളെയും നശിപ്പിക്കുമെന്ന വിവാദ പ്രസ്താവനയിൽ മാപ്പ് പറഞ്ഞ് പശ്ചിമ ബംഗാൾ ബിജെപി എംഎൽഎ പാപിയ അധികാരി. തലമുറകളായി മുതിർന്നവർ പറഞ്ഞുപോരുന്ന പഴയകാല വിശ്വാസങ്ങളാണ് താൻ പങ്കുവെച്ചതെന്നും, ശാസ്ത്രം ഏറെ മുന്നേറിയ ഇന്നത്തെ കാലഘട്ടത്തിൽ ആ കാഴ്ചപ്പാട് അനുയോജ്യമാകണമെന്നില്ലെന്നും അവർ വ്യക്തമാക്കി. തന്റെ വാക്കുകളെ ചില മാധ്യമങ്ങൾ ടിആർപിക്കായി വളച്ചൊടിച്ചതാണെന്നും അവർ കുറ്റപ്പെടുത്തി.
വിളക്കുകൾ കൊളുത്തുന്നത് ദുഷ്ടശക്തികളെ തുരത്തുമെന്നും പടക്കം പൊട്ടിക്കുന്നത് രോഗാണുക്കളെ ഇല്ലാതാക്കുമെന്നുമുള്ള മുൻതലമുറയുടെ വാക്കുകളാണ് താൻ ഉദ്ദേശിച്ചതെന്നാണ് എംഎൽഎയുടെ വിശദീകരണം. എന്നാൽ പ്രസ്താവന പുറത്തുവന്നതിന് പിന്നാലെ കടുത്ത പരിഹാസവും വിമർശനവുമാണ് സമൂഹമാധ്യമങ്ങളിൽ ഉയർന്നത്; ആസ്ത്മയോ ഹൃദ്രോഗമോ ഉള്ളവർക്ക് പടക്കപ്പുക ശാശ്വത ആശ്വാസമാകുമെന്ന തരത്തിൽ ആളുകൾ പരിഹാസമുയർത്തി.
ദീപാവലി ദിനത്തിൽ കൊൽക്കത്തയിലെ ശരാശരി വായുഗുണനിലവാര സൂചിക (AQI) 301 രേഖപ്പെടുത്തിയ സാഹചര്യത്തിലാണ് എംഎൽഎയുടെ പരാമർശം ചർച്ചയായത്. കേന്ദ്ര മലിനീകരണ നിയന്ത്രണ ബോർഡിന്റെ മാനദണ്ഡപ്രകാരം അതീവ ഗുരുതരമായ വിഭാഗത്തിലാണ് ഈ തോത് ഉൾപ്പെടുന്നത്.
