ചെന്നൈ: വനിതാ ജില്ലാ കളക്ടർക്ക് മൊബൈൽ ഫോണിൽ അശ്ലീല സന്ദേശങ്ങൾ അയക്കുകയും മദ്യപിച്ച് രാത്രിയിൽ വസതിയിലെത്തുകയും ചെയ്തുവെന്ന പരാതിയിൽ കള്ളക്കുറിച്ചിയിലെ ടിവികെ (TVK) എംഎൽഎ അരുൾ വിഗ്നേഷിനെതിരെ നടപടി. കളക്ടറുടെ കുടുംബം നേരിട്ടെത്തി മന്ത്രി എൻ. ആനന്ദിന് പരാതി നൽകിയതിനെ തുടർന്ന് എംഎൽഎയ്ക്ക് താക്കീത് നൽകിയിട്ടുണ്ട്. സംഭവം പാർട്ടിയുടെ അച്ചടക്ക സമിതി വിശദമായി പരിശോധിക്കുമെന്നും വനിതാ കളക്ടറുടെ സുരക്ഷയ്ക്കായി പ്രത്യേക പോലീസ് കാവൽ ഏർപ്പെടുത്തിയതായും അധികൃതർ അറിയിച്ചു.
എന്നാൽ തനിക്കെതിരെയുള്ള ആരോപണങ്ങൾ പൂർണ്ണമായും അടിസ്ഥാനരഹിതമാണെന്ന് എംഎൽഎ അരുൾ വിഗ്നേഷ് വ്യക്തമാക്കി. വനിതാ കളക്ടർക്ക് അശ്ലീല സന്ദേശങ്ങൾ അയച്ചിട്ടില്ലെന്നും, ജില്ലയിലെ പുതിയ ബസ് സ്റ്റാൻഡ് നിർമ്മാണവുമായി ബന്ധപ്പെട്ട് താൻ ഉന്നയിച്ച അഴിമതി ആരോപണങ്ങളിലുള്ള രാഷ്ട്രീയ പ്രതികാരമാണ് ഇപ്പോഴത്തെ പരാതിക്ക് പിന്നിലെന്നും അദ്ദേഹം പറഞ്ഞു. വ്യക്തിഹത്യ ചെയ്യുന്ന വ്യാജ പ്രചാരണങ്ങൾക്കെതിരെ ശക്തമായ നിയമനടപടികൾ സ്വീകരിക്കുമെന്നും എംഎൽഎ കൂട്ടിച്ചേർത്തു.
സംഭവത്തിൽ ടിവികെ ഭരണകൂടത്തിനെതിരെ കടുത്ത വിമർശനവുമായി ഡിഎംകെ എംപി കനിമൊഴി രംഗത്തെത്തി. സംസ്ഥാനത്ത് കൊലപാതകങ്ങളും മോഷണങ്ങളും വർദ്ധിച്ച് ക്രമസമാധാന നില പൂർണ്ണമായി തകർന്നുവെന്നും, സ്വന്തം ജില്ല ഭരിക്കുന്ന ഒരു കളക്ടർക്ക് പോലും സുരക്ഷയില്ലാത്ത സ്ഥിതിയാണെന്നും അവർ കുറ്റപ്പെടുത്തി. വിഷയത്തിൽ മുഖ്യമന്ത്രി നിലപാട് വ്യക്തമാക്കി മറുപടി നൽകണമെന്നും കനിമൊഴി ആവശ്യപ്പെട്ടു.
