ഉഡുപ്പി: കർണാടകയിലെ കുക്കെ സുബ്രഹ്മണ്യത്തിൽ ജീവനൊടുക്കാൻ നദിയിലേക്ക് ചാടിയ യുവതിയെ മുതല കടിച്ചു. ബുധനാഴ്ച രാത്രി കുമാരധാര പാലത്തിന് സമീപമാണ് സംഭവം. വ്യക്തിപരമായ ബുദ്ധിമുട്ടുകൾ മൂലം നദിയിലേക്ക് ചാടിയ യുവതിയെ വെള്ളത്തിൽ വെച്ച് മുതല ആക്രമിക്കുകയായിരുന്നു.
മുതലയുടെ കടിയേറ്റതോടെ യുവതി ഉറക്കെ നിലവിളിക്കുകയും ശബ്ദം കേട്ട് സമീപത്തെ ലോഡ്ജ് ജീവനക്കാർ സുബ്രഹ്മണ്യ പോലീസിനെ വിവരമറിയിക്കുകയുമായിരുന്നു. ഉടൻതന്നെ സ്ഥലത്തെത്തിയ പോലീസ് സംഘം നാട്ടുകാരുടെ സഹായത്തോടെ യുവതിയെ നദിയിൽ നിന്ന് കരയ്ക്ക് കയറ്റി.
മുതലയുടെ ആക്രമണത്തിൽ നിസ്സാര പരിക്കുകളേറ്റ ഇവരെ അടുത്തുള്ള പ്രാദേശിക ആശുപത്രിയിൽ പ്രവേശിപ്പിച്ചു. പ്രാഥമിക ചികിത്സയ്ക്കും കൗൺസിലിംഗിനും ശേഷം ബന്ധുക്കൾക്കൊപ്പം വിട്ടയച്ചു. കുടുംബത്തിന്റെ അഭ്യർത്ഥന മാനിച്ച് യുവതിയുടെ പേരുവിവരങ്ങൾ വെളിപ്പെടുത്തിയിട്ടില്ലെന്നും സംഭവത്തിൽ പരാതിയൊന്നും രജിസ്റ്റർ ചെയ്തിട്ടില്ലെന്നും പോലീസ് വ്യക്തമാക്കി.
