പഞ്ചാബ്: അമൃത്സറിൽ നിന്ന് ന്യൂ ജൽപൈഗുരിയിലേക്ക് സർവീസ് നടത്തുന്ന കർമ്മഭൂമി എക്സ്പ്രസിന് (ട്രെയിൻ നമ്പർ 12508) തീപിടിച്ചു. സരായ് ബഞ്ചാര റെയിൽവേ സ്റ്റേഷന് സമീപം നാല് കോച്ചുകളിലേക്ക് തീ പടർന്നുപിടിച്ചെങ്കിലും ആർക്കും പരിക്കേൽക്കുകയോ ജീവഹാനി സംഭവിക്കുകയോ ചെയ്തിട്ടില്ലെന്ന് നോർത്തേൺ റെയിൽവേ അറിയിച്ചു.
രാജ്പുരയിൽ നിന്ന് 15 കിലോമീറ്റർ അകലെയുള്ള ബസന്ത്പുര സ്റ്റേഷന് അടുത്തുവെച്ചാണ് അപകടം ശ്രദ്ധയിൽപ്പെട്ടത്. പ്രാഥമിക വിവരങ്ങൾ പ്രകാരം ട്രെയിനിന്റെ എൻജിൻ ഭാഗത്ത് നിന്നുണ്ടായ ഷോർട്ട് സർക്യൂട്ടാണ് തീപിടുത്തത്തിന് കാരണമെന്ന് സംശയിക്കുന്നുണ്ടെങ്കിലും ഇക്കാര്യം റെയിൽവേ ഔദ്യോഗികമായി സ്ഥിരീകരിച്ചിട്ടില്ല.
കോച്ചുകളിൽ നിന്ന് പുകയും തീയും ഉയർന്നതിനെത്തുടർന്ന് റെയിൽവേ ജീവനക്കാരും അടിയന്തര രക്ഷാപ്രവർത്തകരും സ്ഥലത്തെത്തി സ്ഥിതിഗതികൾ നിയന്ത്രണവിധേയമാക്കി.
