ന്യൂഡൽഹി: വികസിത് ഭാരത് ഗ്യാരണ്ടി ഫോർ റോസ്ഗാർ ആൻഡ് ആജീവിക മിഷൻ (ഗ്രാമീൺ) ആക്ട് അഥവാ 'വി ബി - ജി റാം ജി' (VB-G RAM G) പദ്ധതിക്ക് കീഴിൽ ക്ലോൺ ആപ്പുകൾ വഴി വൻതോതിൽ വ്യാജ ഹാജർ രേഖപ്പെടുത്തുന്നുവെന്ന ആരോപണവുമായി കോൺഗ്രസ്. ഔദ്യോഗിക നാഷണൽ മൊബൈൽ മോണിറ്ററിംഗ് സിസ്റ്റം (എൻ.എം.എം.എസ്) ആപ്പിന്റെ മാതൃകയിലുള്ള വ്യാജ ആപ്ലിക്കേഷനുകൾ നിർമ്മിച്ച്, മൊബൈലുകളിൽ മുൻകൂട്ടി സൂക്ഷിച്ച ചിത്രങ്ങൾ ഉപയോഗിച്ച് കൂട്ടത്തോടെ ഹാജർ രേഖപ്പെടുത്തിയാണ് തട്ടിപ്പ് നടത്തുന്നതെന്ന് റിപ്പോർട്ട് ചൂണ്ടിക്കാട്ടി എഐസിസി ജനറൽ സെക്രട്ടറി ജയ്‌റാം രമേശ് വ്യക്തമാക്കി.
ഉത്തർപ്രദേശിലെ സന്ത് കബീർ നഗർ ജില്ലയിലും ഗൊരഖ്പൂരിലും സമാനമായ രീതിയിൽ വ്യാപകമായി വ്യാജ ഹാജർ തട്ടിപ്പ് നടന്നിട്ടുണ്ടെന്ന് അദ്ദേഹം ചൂണ്ടിക്കാട്ടി. വിഷയം കോൺഗ്രസ് പൊതുശ്രദ്ധയിൽ കൊണ്ടുവന്നതോടെ സർക്കാരിന് ഇതിൽ പരസ്യ വിശദീകരണം നൽകേണ്ടി വന്നതായും ജയ്‌റാം രമേശ് പറഞ്ഞു.
ശ്രീരാമന്റെ പേര് ദുരുപയോഗം ചെയ്ത് ബിജെപി ഇനിയുമെത്ര തട്ടിപ്പുകൾ നടത്തുമെന്നും രാമക്ഷേത്ര സംഭാവനകൾ തട്ടിയെടുക്കപ്പെട്ടതിന് പിന്നാലെ ഇപ്പോൾ ശ്രീരാമന്റെ നാമത്തിൽ വ്യാജ തൊഴിലുകൾ ചമയ്ക്കുകയാണെന്നും അദ്ദേഹം കുറ്റപ്പെടുത്തി. എംജിഎൻആർഇജിഎ വഴിയുള്ള 100 ദിവസത്തെ തൊഴിൽ അവകാശങ്ങൾക്ക് മേൽ കടന്നുകയറിയ ശേഷം, വി ബി-ജി റാം ജി പദ്ധതിയിലെ തട്ടിപ്പിലൂടെ പാവപ്പെട്ടവരെ കൊള്ളയടിക്കുകയാണെന്നും ഇത് കേവലം സാമ്പത്തിക അഴിമതി മാത്രമല്ല, വിശ്വാസത്തെ വഞ്ചിച്ച് അധഃസ്ഥിതരുടെ അവകാശങ്ങൾ കവർന്നെടുക്കലാണെന്നും അദ്ദേഹം കൂട്ടിച്ചേർത്തു.
