ന്യൂഡൽഹി: രാംലീല മൈതാനിയിൽ സംഘടിപ്പിച്ച 'ചലോ ദില്ലി' പ്രതിഷേധ പരിപാടിയിൽ പങ്കെടുക്കാതിരുന്ന മധ്യപ്രദേശിലെ 60 യൂത്ത് കോൺഗ്രസ് ഭാരവാഹികളെ പാർട്ടിയിൽ നിന്ന് സസ്‌പെൻഡ് ചെയ്തു. ഒമ്പത് ജില്ലാ പ്രസിഡന്റുമാർ, അഞ്ച് വൈസ് പ്രസിഡന്റുമാർ, 14 ജനറൽ സെക്രട്ടറിമാർ, 32 സെക്രട്ടറിമാർ എന്നിവരുൾപ്പെടെയുള്ളവർക്കെതിരെയാണ് അച്ചടക്കനടപടി സ്വീകരിച്ചത്. ഇവരുടെ ഭാഗത്തുനിന്നുണ്ടായത് ഗുരുതരമായ സംഘടനാപരമായ അച്ചടക്കലംഘനമാണെന്നാണ് പാർട്ടി നേതൃത്വത്തിന്റെ വിശദീകരണം.
എസ്ഐആറിനെതിരെ (SIR) ഡൽഹിയിൽ നടന്ന റാലിയിൽ എല്ലാ പാർട്ടി ഭാരവാഹികളും നിർബന്ധമായും പങ്കെടുക്കണമെന്ന് മുൻകൂട്ടി നിർദേശം നൽകിയിരുന്നു. എന്നാൽ ഈ നിർദ്ദേശം അവഗണിച്ച് വിട്ടുനിന്നതിനെ തുടർന്നാണ് കൂട്ട സസ്പെൻഷൻ ഉത്തരവ് പുറപ്പെടുവിച്ചത്.
അതേസമയം, നേതൃത്വത്തിന്റെ കൂട്ടനടപടിക്കെതിരെ യൂത്ത് കോൺഗ്രസിനുള്ളിൽ തന്നെ കടുത്ത അതൃപ്തി ഉയർന്നിട്ടുണ്ട്. സസ്പെൻഷൻ നടപടികളിലേക്ക് കടക്കുന്നതിന് മുൻപ് വിശദീകരണം തേടിക്കൊണ്ട് തങ്ങൾക്ക് യാതൊരുവിധ കാരണം കാണിക്കൽ നോട്ടീസും നൽകിയിരുന്നില്ലെന്ന് നടപടി നേരിട്ട നേതാക്കൾ പരാതിപ്പെടുന്നു.
