ന്യൂഡൽഹി: സായുധ സേനയിലെ അഗ്നിവീറുകളുടെ സേവന കാലാവധി രണ്ട് വർഷത്തേക്ക് കൂടി നീട്ടാൻ കേന്ദ്ര മന്ത്രിസഭ അംഗീകാരം നൽകി. നാല് വർഷത്തെ പ്രാരംഭ സേവനത്തിന് ശേഷം സ്ഥിരം സൈനിക നിയമനത്തിലേക്ക് തിരഞ്ഞെടുക്കപ്പെടാത്ത 75 ശതമാനം വരുന്ന അഗ്നിവീറുകൾക്കാണ് ഈ ആനുകൂല്യം ലഭിക്കുക. ആറ് വർഷത്തെ സേവന കാലാവധി പൂർത്തിയാക്കുന്ന ഘട്ടത്തിൽ സൈന്യത്തിന്റെ നിശ്ചിത മാനദണ്ഡങ്ങൾ പാലിക്കുന്നവർക്ക് സ്ഥിരം സേനയിലേക്ക് പ്രവേശിക്കാൻ വീണ്ടും അവസരമൊരുക്കും.
മൂന്ന് സേനാ വിഭാഗങ്ങളുടെയും ശുപാർശകളെ തുടർന്നാണ് പരിഷ്കരണമെന്ന് അറിയിച്ച ചീഫ് ഓഫ് ഡിഫൻസ് സ്റ്റാഫ് (സിഡിഎസ്) ജനറൽ സുബ്രഹ്മണി, പുതുക്കിയ കാലാവധിയിൽ ഉയർന്ന വേതനവും കൂടുതൽ സേവാനിധി പാക്കേജും സീനിയോറിറ്റി ആനുകൂല്യങ്ങളും ലഭ്യമാക്കുമെന്ന് വ്യക്തമാക്കി. പുതിയ വ്യവസ്ഥയനുസരിച്ച് അഞ്ചാം വർഷത്തിൽ 43,500 രൂപയും ആറാം വർഷത്തിൽ 47,500 രൂപയും പ്രതിമാസ ശമ്പളമായി അഗ്നിവീറുകൾക്ക് ലഭിക്കും. ആദ്യ ഘട്ടത്തിൽ സ്ഥിരം നിയമനം ലഭിക്കാത്തവർക്ക് കൂടുതൽ കാലം സേവനത്തിൽ തുടരാൻ അവസരം നൽകാനാണ് ഈ നടപടി.
18,300 പേർ ഉൾപ്പെടുന്ന പ്രഥമ ബാച്ച് അഗ്നിവീറുകളുടെ നാല് വർഷ കാലാവധി തീർന്ന് പിരിച്ചുവിടാൻ ആഴ്ചകൾ മാത്രം ബാക്കിനിൽക്കെയാണ് നിർണ്ണായക പ്രഖ്യാപനം. 2022-ൽ നടപ്പിലാക്കിയ അഗ്നിപഥ് പദ്ധതിക്ക് കീഴിൽ കര, വ്യോമ, നാവിക സേനകളിലായി നിലവിൽ മൂന്ന് ലക്ഷം അഗ്നിവീറുകളുണ്ട്. യുവാക്കളുടെ ഭാഗത്തുനിന്നുണ്ടായ ശക്തമായ പ്രതിഷേധങ്ങളും പഞ്ചാബ്, ഉത്തരാഖണ്ഡ്, ഹിമാചൽ പ്രദേശ് തുടങ്ങിയ സംസ്ഥാനങ്ങളിൽ വരാനിരിക്കുന്ന നിയമസഭാ തിരഞ്ഞെടുപ്പുകളുമാണ് കേന്ദ്ര തീരുമാനത്തിന് പ്രേരകമായതെന്നാണ് വിലയിരുത്തൽ.
തീരുമാനത്തിനെതിരെ രൂക്ഷ പ്രതികരണവുമായി കോൺഗ്രസ് രംഗത്തെത്തി. 2022-ൽ പദ്ധതി കൊണ്ടുവന്നപ്പോൾത്തന്നെ രാഹുൽ ഗാന്ധി ഇതിനെ ശക്തമായി എതിർത്തിരുന്നുവെന്ന് ചൂണ്ടിക്കാട്ടിയ പാർട്ടി നേതാവ് പവൻ ഖേര, ഉത്തരാഖണ്ഡ്, ഉത്തർപ്രദേശ്, പഞ്ചാബ്, മണിപ്പൂർ, ഹിമാചൽ പ്രദേശ് എന്നീ സംസ്ഥാനങ്ങളിലെ വരാനിരിക്കുന്ന നിയമസഭാ തിരഞ്ഞെടുപ്പ് മാത്രമാണ് പെട്ടെന്നുള്ള പരിഷ്കാരങ്ങൾക്ക് കാരണമെന്ന് ആരോപിച്ചു. നിരവധി പോരായ്മകളുള്ള ഈ പദ്ധതി ഒടുവിൽ കേന്ദ്ര സർക്കാരിന് പൂർണ്ണമായി പിൻവലിക്കേണ്ടി വരുമെന്നും അദ്ദേഹം കൂട്ടിച്ചേർത്തു.
