ഡൽഹി: അമേരിക്കൻ ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിയുടെ ഉറച്ച കോട്ടകളായിരുന്ന ടെക്സസിലും കാൻസസിലും അട്ടിമറി വിജയം നേടി ഡെമോക്രാറ്റിക് പാർട്ടി. പതിറ്റാണ്ടുകളായി റിപ്പബ്ലിക്കൻമാരുടെ കൈവശമിരുന്ന ഇരു സംസ്ഥാനങ്ങളിലെയും സെനറ്റ് സീറ്റുകൾ പിടിച്ചെടുത്ത ഡെമോക്രാറ്റുകൾ, യുഎസ് സെനറ്റിലും ജനപ്രതിനിധി സഭയിലും ശക്തമായ മുന്നേറ്റമാണ് നടത്തിയത്.
തിരഞ്ഞെടുപ്പ് പരാജയത്തിന്റെ പശ്ചാത്തലത്തിൽ യുഎസ് മുൻ പ്രസിഡന്റ് ഡോണൾഡ് ട്രംപിനെയും ഇന്ത്യൻ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെയും പരിഹസിച്ച് സിജെപി സ്ഥാപകൻ അഭിജീത് ദീപ്കെ രംഗത്തെത്തി. ഗ്യാനേഷ് ഒപ്പമുണ്ടായിരുന്നെങ്കിൽ ട്രംപിന് ഇത്തരം ഒരു ദുരവസ്ഥ ഉണ്ടാകില്ലായിരുന്നുവെന്ന് അദ്ദേഹം എക്സിൽ കുറിച്ചു. ഇന്ത്യയിൽ എസ്ഐആർ നടപടികളുമായി ബന്ധപ്പെട്ട് അർഹരായ വോട്ടർമാരെ ഒഴിവാക്കാൻ തിരഞ്ഞെടുപ്പ് കമ്മീഷൻ ശ്രമിക്കുന്നുവെന്ന് പ്രതിപക്ഷം ആരോപിക്കുകയും കമ്മീഷണർക്കെതിരെ പ്രതിഷേധം ശക്തമാവുകയും ചെയ്യുന്ന പശ്ചാത്തലത്തിലാണ് ഈ പരിഹാസം.
യുഎസ് തെരഞ്ഞെടുപ്പ് ഫലം സംബന്ധിച്ച് സിജെപി നേതാവ് അശുതോഷ് റാങ്ക പങ്കുവെച്ച ട്വീറ്റിന് മറുപടിയായി, ജനങ്ങൾ ഇപ്പോൾ വിദ്വേഷ രാഷ്ട്രീയത്തിനെതിരെയാണ് വോട്ട് ചെയ്യുന്നതെന്നും എക്സ് കുറിപ്പിലൂടെ ചൂണ്ടിക്കാട്ടിയിട്ടുണ്ട്.
