ന്യൂഡൽഹി: ഐസ (AISA) നേതാവ് നേഹ ബോറ ഹിന്ദു ആചാരങ്ങളെയും വിശ്വാസങ്ങളെയും അവഹേളിക്കുന്നുവെന്ന ഗുരുതര ആരോപണവുമായി ബിജെപി ഐടി സെൽ മേധാവിയും ദേശീയ വക്താവുമായ പ്രദീപ് ഭണ്ഡാരി രംഗത്ത്. ബ്രാഹ്മണ്യ വ്യവസ്ഥയിൽ നിന്ന് സ്ത്രീകൾക്ക് സുരക്ഷ ഉറപ്പാക്കണമെന്നും, കത്വ സംഭവം പരാമർശിച്ചുകൊണ്ട് ക്ഷേത്രങ്ങളിൽ പൂജാരിമാർ ബലാത്സംഗം നടത്തുന്നുണ്ടെന്നും നേഹ പറയുന്ന വീഡിയോ ചൂണ്ടിക്കാട്ടിയാണ് ബിജെപിയുടെ വിമർശനം.
നേഹ ബോറയുടെ പരാമർശങ്ങൾക്ക് പ്രചോദനം രാഹുൽ ഗാന്ധിയാണെന്നും, ക്ഷേത്രങ്ങൾക്കുള്ളിൽ പെൺകുട്ടികൾ അതിക്രമത്തിന് ഇരയാകുന്നുവെന്ന് മുമ്പ് രാഹുൽ പറഞ്ഞതിന് സമാനമായ നിലപാടാണിതെന്നും എൻഡിടിവിക്ക് നൽകിയ പ്രതികരണത്തിൽ ഭണ്ഡാരി വ്യക്തമാക്കി. മുഖ്യ തിരഞ്ഞെടുപ്പ് കമ്മീഷണർ ജ്ഞാനേഷ് കുമാറിനെ ഇംപീച്ച് ചെയ്യാനുള്ള പ്രമേയത്തെ പിന്തുണച്ചുകൊണ്ട് വോട്ടർപട്ടികയിൽ നിന്ന് പേരുകൾ വെട്ടിമാറ്റിയെന്നും വോട്ടിന്റെ പവിത്രത തകർത്തെന്നും ആരോപിച്ചതിന് പിന്നാലെയാണ് ബോറ ബ്രാഹ്മണ്യത്തിനെതിരെ സംസാരിച്ചത്.
ദരിദ്രരും സ്ത്രീകളും മൃഗങ്ങളും ചൂഷണം ചെയ്യപ്പെടാൻ അർഹരാണെന്ന് കരുതുന്ന വ്യവസ്ഥയാണ് ബ്രാഹ്മണ്യമെന്നും, ഈ സാഹചര്യത്തിൽ ബ്രാഹ്മണ സ്ത്രീകൾ പോലും സുരക്ഷിതരല്ലെന്നും ക്ഷേത്രങ്ങൾക്കുള്ളിൽ പുരോഹിതന്മാർ ബലാത്സംഗം ചെയ്യുന്ന സംഭവങ്ങൾ ഉണ്ടായിട്ടുണ്ടെന്നുമായിരുന്നു ബോറയുടെ വാക്കുകൾ.
നേഹ ബോറയെ 'രാഹുൽ ഗാന്ധിയുടെ പോസ്റ്റർ ഗേൾ' എന്ന് വിശേഷിപ്പിച്ച് എക്സിൽ വീഡിയോ പങ്കുവെച്ച ഭണ്ഡാരി, കോൺഗ്രസ് വോട്ട് ബാങ്കിനായി ഹിന്ദുക്കളെ വെറുക്കുകയാണെന്ന് കുറ്റപ്പെടുത്തി. 'ഹിന്ദു ഭീകരത' എന്ന പദം ഉപയോഗിച്ച പാരമ്പര്യമാണ് കോൺഗ്രസിനുള്ളതെന്നും, സനാതന ധർമ്മത്തെ തകർക്കാൻ ശ്രമിക്കുന്ന ഇവരുടെ രാഷ്ട്രീയം ഇന്ത്യയുടെ പരമാധികാരത്തിനും ഭരണഘടനയ്ക്കും അഖണ്ഡതയ്ക്കും ഭീഷണിയാണെന്നും അദ്ദേഹം ആരോപിച്ചു.
