ന്യൂഡൽഹി: സമഗ്ര വോട്ടർ പട്ടിക പരിഷ്കരണത്തിന്റെ ഭാഗമായി വോട്ടർമാർ പുതിയ പേര് ചേർക്കാൻ ഉപയോഗിക്കുന്ന ഫോം 6-ൽ നിർണ്ണായക മാറ്റം വരുത്തി തിരഞ്ഞെടുപ്പ് കമ്മീഷൻ. ഫോം 6-ന്റെ ഓൺലൈൻ പതിപ്പിൽ ഉൾപ്പെടുത്തിയിരുന്ന എസ്ഐആർ (SIR) ഡിക്ലറേഷൻ പൂർണ്ണമായി നീക്കം ചെയ്തു. വോട്ടർമാർ നൽകേണ്ട സത്യവാങ്മൂലം ഒഴിവാക്കി ഇത് പ്രത്യേക ഫോമായി നിലനിർത്താനാണ് കമ്മീഷന്റെ തീരുമാനം.
രണ്ട് വ്യത്യസ്ത വിഭാഗങ്ങളെ ഒറ്റ ഫോമിന്റെ ഭാഗമാക്കുന്നത് നിയമവിരുദ്ധമാണെന്ന് തിരഞ്ഞെടുപ്പ് കമ്മീഷണർമാർ നേരത്തെ തന്നെ ചൂണ്ടിക്കാണിച്ചിരുന്നു. മുൻപുണ്ടായിരുന്ന ഡിക്ലറേഷൻ അനുസരിച്ച്, അവസാന എസ്ഐആറിലെ വോട്ടറുടെ വിവരങ്ങളോ മാതാപിതാക്കളുടെ വിവരങ്ങളോ രേഖപ്പെടുത്താതെ എൻറോൾമെന്റ് നടപടികളുമായി മുന്നോട്ടുപോകാൻ അപേക്ഷകർക്ക് സാധിക്കുമായിരുന്നില്ല.
ഫോം 6-ൽ നിന്ന് ഈ ഡിക്ലറേഷൻ ഭാഗം ഒഴിവാക്കുമെന്ന കാര്യം തിരഞ്ഞെടുപ്പ് കമ്മീഷൻ സുപ്രീം കോടതിയിൽ സമർപ്പിച്ച സത്യവാങ്മൂലത്തിലും വ്യക്തമാക്കിയിരുന്നു.
