ന്യൂഡൽഹി: പ്രതിപക്ഷം രാജ്യവിരുദ്ധരാണെന്ന ആരോപണങ്ങൾക്ക് മറുപടിയുമായി പ്രധാനമന്ത്രി നരേന്ദ്ര മോദിയെ തുറന്ന സംവാദത്തിന് വെല്ലുവിളിച്ച് കോൺഗ്രസ് നേതാവ് രാഹുൽ ഗാന്ധി. വെല്ലുവിളിച്ച് 24 മണിക്കൂർ പിന്നിട്ടതായും ഏത് വേദിയിലും എവിടെ വെച്ചും സംവാദത്തിന് താൻ സന്നദ്ധനാണെന്നും അദ്ദേഹം എക്സ് കുറിപ്പിലൂടെ വ്യക്തമാക്കി. സംവാദത്തിന്റെ വിധികർത്താവായി ആർഎസ്എസ് അധ്യക്ഷൻ മോഹൻ ഭാഗവതിനെ പോലും നിയോഗിക്കാമെന്നും രാഹുൽ ഗാന്ധി പറഞ്ഞു.
വിദേശശക്തികളുമായി യഥാർത്ഥത്തിൽ ആർക്കാണ് ബന്ധമുള്ളതെന്നും ആ ബന്ധങ്ങളുടെ സ്വഭാവമെന്താണെന്നും സംവാദത്തിലൂടെ ജനം തിരിച്ചറിയട്ടെ എന്ന് അദ്ദേഹം ചൂണ്ടിക്കാട്ടി. രാജ്യത്തെ സമ്പദ്‌വ്യവസ്ഥ, അമേരിക്കയുമായുള്ള കരാർ അതിവേഗത്തിൽ യാഥാർത്ഥ്യമാക്കിയതിന് പിന്നിലെ കാരണം, കാബിനറ്റിനെ അറിയിക്കാതെ പ്രധാനമന്ത്രി ഒറ്റയ്ക്ക് തീരുമാനമെടുത്ത സാഹചര്യം, അദാനി കേസ് അവസാനിപ്പിച്ച പശ്ചാത്തലം എന്നിവയെല്ലാം ചർച്ചയാകണമെന്ന് അദ്ദേഹം ആവശ്യപ്പെട്ടു.
മാധ്യമങ്ങളും യുവാക്കളും സാക്ഷിയാകുന്ന വേദിയിൽ വസ്തുതകൾ പൂർണ്ണമായി ജനങ്ങൾക്ക് മുന്നിൽ വെളിപ്പെടട്ടെയെന്നും രാഹുൽ ഗാന്ധി കൂട്ടിച്ചേർത്തു. വിവിധ വിഷയങ്ങളിൽ തനിക്കെതിരെ പ്രധാനമന്ത്രി ഏകദേശം 45 മാനനഷ്ടക്കേസുകൾ ഫയൽ ചെയ്തിട്ടുണ്ടെങ്കിലും വിദേശബന്ധങ്ങളുടെ കാര്യത്തിൽ ഇതുവരെ കേസ് നൽകിയിട്ടില്ലെന്നും, വേണമെങ്കിൽ ആ വിഷയത്തിലും കേസ് നൽകാമെന്നും സംവാദത്തിന് തയ്യാറാകണമെന്നും അദ്ദേഹം വ്യക്തമാക്കി.
