ന്യൂഡൽഹി: ഒരു സമരകേന്ദ്രവും അനിശ്ചിതകാലത്തേക്ക് കൈവശം വെക്കാൻ ആർക്കും അവകാശമില്ലെന്നും പ്രതിഷേധങ്ങൾക്ക് നിശ്ചിത സമയപരിധിയും പ്രത്യേക ഇടങ്ങളും അനുവദിക്കണമെന്നും സുപ്രീം കോടതി. അനുവദിക്കപ്പെട്ട സ്ഥലങ്ങളിൽ നിശ്ചിത കാലയളവിലേക്ക് മാത്രമായിരിക്കണം പ്രക്ഷോഭങ്ങൾ നടക്കേണ്ടതെന്ന് ചീഫ് ജസ്റ്റിസ് സൂര്യകാന്ത് വ്യക്തമാക്കി. മറ്റ് സംഘടനകൾക്കും പ്രകടനം നടത്താൻ തുല്യ അവകാശമുണ്ടെന്ന് അദ്ദേഹം ചൂണ്ടിക്കാട്ടി.
ഡൽഹിയിലെ സമരങ്ങൾക്ക് നേരെയുണ്ടായ പോലീസ് നടപടികൾ ചോദ്യം ചെയ്തുള്ള ഹർജികൾ പരിഗണിക്കവേയായിരുന്നു ചീഫ് ജസ്റ്റിസിന്റെ നിരീക്ഷണം. നേരത്തെ ജന്തർ മന്തറിന് നൽകിയിരുന്ന അംഗീകൃത സമരവേദി പദവി സർക്കാർ റദ്ദാക്കുകയും, തുടർന്ന് രാംലീല മൈതാനം ഉൾപ്പെടെ മൂന്ന് ബദൽ കേന്ദ്രങ്ങൾ പ്രക്ഷോഭങ്ങൾക്കായി നിശ്ചയിക്കുകയും ചെയ്തിരുന്നു.
വിഷയത്തിൽ കോടതിക്കുള്ളിൽ അഭിഭാഷകർ തമ്മിൽ രൂക്ഷമായ വാദപ്രതിവാദങ്ങൾ ഉണ്ടായതിനെ തുടർന്ന് ചീഫ് ജസ്റ്റിസ് ക്ഷുഭിതനായി. ഇത് ചന്തയല്ലെന്നും ഈ രീതിയിലുള്ള അനാവശ്യ ബഹളങ്ങൾ അവസാനിപ്പിക്കണമെന്നും അദ്ദേഹം അഭിഭാഷകർക്ക് മുന്നറിയിപ്പ് നൽകി.
