ബെംഗളൂരു: മുൻ മുഖ്യമന്ത്രി സിദ്ധരാമയ്യയെ ലക്ഷ്യമിട്ട് പുറത്തിറക്കിയ സ്റ്റിങ് ഓപ്പറേഷൻ വീഡിയോയുടെ മുഖ്യ സൂത്രധാരൻ കേന്ദ്രമന്ത്രി എച്ച്.ഡി. കുമാരസ്വാമിയാണെന്ന് ഗ്രേറ്റർ ബെംഗളൂരു ഡെവലപ്‌മെന്റ് മന്ത്രി കൃഷ്ണ ബൈരെ ഗൗഡ ആരോപിച്ചു. കുമാരസ്വാമിയുടെ സോഷ്യൽ മീഡിയ സംഘമാണ് ഇതിനായി നേരിട്ട് പ്രവർത്തിച്ചതെന്നും, പദ്ധതി ആസൂത്രണം ചെയ്യാനും നടപ്പിലാക്കാനും അദ്ദേഹത്തിന്റെ ഔദ്യോഗിക വസതി ഉപയോഗിച്ചതായും ഗൗഡ സോഷ്യൽ മീഡിയയിലൂടെ വ്യക്തമാക്കി. ഇതിന്റെ ഭാഗമായി സാമ്പത്തിക ഇടപാടുകൾ നടന്നതായും അദ്ദേഹം ചൂണ്ടിക്കാട്ടി.
വീഡിയോ പുറത്തുവിട്ടതിന്റെ ഉത്തരവാദിത്തം ഇപ്പോഴത്തെ മുഖ്യമന്ത്രി ഡി.കെ. ശിവകുമാറിന്റെ മേൽ കെട്ടിവെക്കാനാണ് കുമാരസ്വാമി ശ്രമിച്ചതെന്നും മന്ത്രി കുറ്റപ്പെടുത്തി.
സിദ്ധരാമയ്യയുടെ ജനപ്രീതിക്ക് കോട്ടമുണ്ടാക്കുക, ഒപ്പം അതിന്റെ പഴി മുഖ്യമന്ത്രി ശിവകുമാറിലേക്ക് തിരിച്ചുവിടുക എന്ന ലക്ഷ്യത്തോടെയാണ് ഈ നീക്കം നടത്തിയത്. ഒറ്റവെടിക്ക് രണ്ടു പക്ഷികളെ വീഴ്ത്താൻ ലക്ഷ്യമിട്ടുള്ള കുമാരസ്വാമിയുടെ രാഷ്ട്രീയ കുതന്ത്രമായിരുന്നു ഇതെന്നും കൃഷ്ണ ബൈരെ ഗൗഡ കൂട്ടിച്ചേർത്തു.
