ചെന്നൈ: തമിഴ്നാട്ടിലെ തേനി തേക്കംപട്ടി സബ് ജയിലിൽ നടന്ന കൊടും പീഡനങ്ങളും മോശം ജീവിതസാഹചര്യങ്ങളും പുറംലോകത്തെ അറിയിക്കാനാണ് തടവുചാടിയതെന്ന് കീഴടങ്ങിയ പ്രതി മീനാക്ഷി സുന്ദരം. ജയിൽ ചാടിയത് 17 പേരല്ലെന്നും തങ്ങൾ 21 പേരുണ്ടായിരുന്നുവെന്നും വ്യക്തമാക്കുന്ന ഇയാളുടെ വീഡിയോ സന്ദേശം സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്. ജയിലിലെ ഭക്ഷണത്തിന്റെ ഗുണനിലവാരമില്ലായ്മയെക്കുറിച്ച് സൂപ്രണ്ടിനോട് പരാതിപ്പെട്ടതിന് പിന്നാലെ ക്രൂരമർദ്ദനത്തിന് ഇരയായെന്നും ജീവൻ നഷ്ടപ്പെടുമെന്ന് ഭയന്നാണ് പുറത്തുകടന്നതെന്നും ഇയാൾ ആരോപിക്കുന്നു.
ഒക്ടോബർ 28-ന് പോലീസിൽ കീഴടങ്ങുന്നതിന് മുന്നോടിയായി മീനാക്ഷി സുന്ദരവും സഹോദരൻ തിരുപ്പതിയും അഭിഭാഷകന് നൽകിയ മൊഴിയാണിതെന്ന് മാതാവ് അറുമുഖത്തമ്മാൾ വെളിപ്പെടുത്തി. പ്രശ്നങ്ങൾ സൃഷ്ടിക്കാനല്ല തങ്ങൾ പുറത്തുവന്നതെന്നും കോടതിയിൽ കീഴടങ്ങാൻ മുൻകൂട്ടി തീരുമാനിച്ചിരുന്നതായും സുന്ദരം വീഡിയോയിൽ വ്യക്തമാക്കുന്നുണ്ട്.
എന്നാൽ ഈ ആരോപണങ്ങൾ കെട്ടിച്ചമച്ചതാണെന്ന് ദക്ഷിണ മേഖലാ ഐജി വിജേന്ദ്ര ബിദാരി പ്രതികരിച്ചു. ഒക്ടോബർ 26-ന് പ്രിൻസിപ്പൽ ജില്ലാ ജഡ്ജി എ. ശരവണകുമാർ പതിവ് പരിശോധനയ്ക്കായി ജയിൽ സന്ദർശിച്ചപ്പോൾ സുന്ദരം ഇത്തരമൊരു പരാതിയും ഉന്നയിച്ചിരുന്നില്ലെന്ന് ഐജി ചൂണ്ടിക്കാട്ടി. സഹോദരങ്ങൾക്കെതിരെ വ്യാജ കേസുകൾ ചുമത്തിയെന്ന വാദം തള്ളിയ മധുര സിറ്റി പോലീസ് കമ്മീഷണർ എസ്. രാജേന്ദ്രൻ, ഇരുവരും പ്രായപൂർത്തിയാകും മുൻപേ കുറ്റകൃത്യങ്ങളിൽ ഏർപ്പെട്ടിരുന്ന സ്ഥിരം കുറ്റവാളികളാണെന്നും മീനാക്ഷി സുന്ദരം കൊലപാതകക്കേസുകളിലും തിരുപ്പതി കഞ്ചാവ് കേസുകളിലും പ്രതികളാണെന്നും വിശദീകരിച്ചു.
കഴിഞ്ഞ ആഴ്ച തേക്കംപട്ടി സബ് ജയിലിൽ നിന്ന് രക്ഷപ്പെട്ട 17 റിമാൻഡ് തടവുകാരെയും രണ്ട് ദിവസത്തിനുള്ളിൽ പോലീസ് അറസ്റ്റ് ചെയ്യുകയോ സ്വമേധയാ കീഴടങ്ങുകയോ ചെയ്തിരുന്നു. സുന്ദരത്തെയും തിരുപ്പതിയെയും സേലം സെൻട്രൽ ജയിലിലേക്കും, മറ്റുള്ളവരെ പാളയംകോട്ട, കോയമ്പത്തൂർ സെൻട്രൽ ജയിലുകളിലേക്കും പിന്നീട് റിമാൻഡ് ചെയ്ത് മാറ്റി.
