ന്യൂഡൽഹി: പൂർണ്ണമായും എഥനോൾ ഉപയോഗിച്ച് പ്രവർത്തിക്കുന്ന E100 ഇന്ധനത്തിന് അനുമതി നൽകി കേന്ദ്ര റോഡ് ഗതാഗത-ഹൈവേ മന്ത്രാലയം വിജ്ഞാപനമിറക്കി. 1989-ലെ കേന്ദ്ര മോട്ടോർ വാഹന നിയമങ്ങളിൽ ഭേദഗതി വരുത്തിയാണ് ഫ്ലെക്സ്-ഫ്യൂവൽ വാഹനങ്ങളുടെ എമിഷൻ മാനദണ്ഡങ്ങളിൽ E85-നൊപ്പം E100 കൂടി ഉൾപ്പെടുത്തിയത്. ക്രൂഡ് ഓയിൽ ഇറക്കുമതി വെട്ടിച്ചുരുക്കുന്നതിനും അന്തരീക്ഷ മലിനീകരണം ലഘൂകരിക്കുന്നതിനും ലക്ഷ്യമിട്ടാണ് ശുദ്ധമായ എഥനോൾ ഇന്ധനത്തിലുള്ള വാഹനങ്ങൾക്ക് സർക്കാർ അനുമതി നൽകിയിരിക്കുന്നത്.
E20-യേക്കാൾ ഉയർന്ന അളവിൽ എഥനോൾ അടങ്ങിയ E85, E100 ഇന്ധനങ്ങൾ ഇതിനായി പ്രത്യേകമായി രൂപകൽപ്പന ചെയ്ത അംഗീകൃത ഫ്ലെക്സ്-ഫ്യൂവൽ വാഹനങ്ങളിൽ മാത്രമേ ഉപയോഗിക്കാവൂ എന്ന് മന്ത്രാലയം വ്യക്തമാക്കിയിട്ടുണ്ട്. സാധാരണ പെട്രോൾ വാഹനങ്ങളിലോ E20 നിർദ്ദേശിച്ചിട്ടുള്ള എൻജിനുകളിലോ ഈ ഉയർന്ന എഥനോൾ മിശ്രിതങ്ങൾ ഉപയോഗിക്കാൻ സാധിക്കില്ല. കൂടാതെ, ചട്ടഭേദഗതിയിലൂടെ ചെറു പെട്രോൾ, ഡീസൽ വാഹനങ്ങളുടെ ഭാരപരിധി 3,000 കിലോഗ്രാമിൽ നിന്ന് 3,500 കിലോഗ്രാമായി ഉയർത്തി.
2026 ഏപ്രിൽ 27-ന് പുറപ്പെടുവിച്ച കരട് ചട്ടങ്ങളുടെ അടിസ്ഥാനത്തിലാണ് പുതിയ ഭേദഗതികൾ കൊണ്ടുവന്നത്. ഔദ്യോഗിക ഗസറ്റിൽ പ്രസിദ്ധീകരിക്കുന്ന തീയതി മുതൽ പുതിയ നിയമങ്ങൾ പ്രാബല്യത്തിൽ വരുമെങ്കിലും രാജ്യവ്യാപകമായി E100 ഇന്ധനം വിപണിയിലെത്തുന്നതിനുള്ള കൃത്യമായ സമയപരിധി വിജ്ഞാപനത്തിൽ രേഖപ്പെടുത്തിയിട്ടില്ല.
