മുംബൈ: ബോളിവുഡ് നടൻ ടൈഗർ ഷ്റോഫിന് നേരെയുണ്ടായ വെടിവെപ്പിൽ രണ്ട് സ്ത്രീകൾ ഉൾപ്പെടെ നാല് പേരെ ഡൽഹി പോലീസ് സ്പെഷ്യൽ സെൽ അറസ്റ്റ് ചെയ്തു. ഹരിയാനയിലെ സോണിപത്ത് ജില്ലയിൽ നിന്ന് പിടിയിലായ കുനാൽ (21), സുമിത് (19), രാധ (23), ബബിത (23) എന്നിവരെ കോടതിയിൽ ഹാജരാക്കി.
ഒരു വിഐപിയെ വധിക്കാൻ ലക്ഷ്യമിട്ടെത്തിയ സംഘം ആദ്യം ഉന്നംവെച്ചത് നടൻ സൽമാൻ ഖാനെയായിരുന്നുവെന്ന് മുംബൈ പോലീസ് വൃത്തങ്ങൾ വ്യക്തമാക്കി. ടൈഗർ ഷ്റോഫിന്റെ വാഹനത്തിന് നേരെ വെടിയുതിർത്ത രണ്ടുപേർ ബാന്ദ്രയിലുള്ള സൽമാൻ ഖാന്റെ വസതി രഹസ്യമായി നിരീക്ഷിച്ചിരുന്നെങ്കിലും, അവിടെയുണ്ടായിരുന്ന കനത്ത സുരക്ഷ കണക്കിലെടുത്ത് ആ നീക്കം ഉപേക്ഷിക്കുകയായിരുന്നു.
തുടർന്നാണ് കാര്യമായ സുരക്ഷാ സന്നാഹങ്ങളില്ലാത്ത ടൈഗർ ഷ്റോഫിലേക്ക് പ്രതികൾ ശ്രദ്ധ തിരിച്ചത്. സോഷ്യൽ മീഡിയ പോസ്റ്റുകൾ വഴി നടൻ എല്ലാ ഞായറാഴ്ചയും ജുഹുവിലെ ഫുട്ബോൾ ഗ്രൗണ്ടിൽ എത്താറുണ്ടെന്ന് മനസ്സിലാക്കിയ സംഘം കൃത്യമായ നിരീക്ഷണത്തിന് ശേഷം ആസൂത്രിതമായി ആക്രമണം നടത്തുകയായിരുന്നുവെന്ന് പോലീസ് അറിയിച്ചു.
