ന്യൂഡൽഹി: വോട്ടർ പട്ടികയിലെ ക്രമക്കേടുകളും പിഴവുകളും പരിശോധിക്കാൻ ഉപയോഗിക്കുന്ന എസ്ഐആർ (SIR) സോഫ്റ്റ്‌വെയറിന്റെ വിശദാംശങ്ങൾ പരസ്യപ്പെടുത്താനാകില്ലെന്ന് കേന്ദ്ര തെരഞ്ഞെടുപ്പ് കമ്മീഷൻ. ഇത് 'ട്രേഡ് സീക്രട്ട്' വിഭാഗത്തിൽപ്പെടുന്നതാണെന്നും മറ്റു രഹസ്യാത്മക സ്വഭാവങ്ങൾ ഉള്ളതിനാലാണ് മറുപടി നൽകാത്തതെന്നും വിവരാവകാശ അപേക്ഷയ്ക്ക് നൽകിയ വിശദീകരണത്തിൽ കമ്മീഷൻ വ്യക്തമാക്കി. തെലങ്കാന സ്വദേശിയായ എം.എ. മുജീബ് ആയൂബ് നൽകിയ അപേക്ഷയിലാണ് കമ്മീഷൻ ഈ നിലപാട് സ്വീകരിച്ചത്.
ഉപയോഗിക്കുന്ന സോഫ്റ്റ്‌വെയറിന്റെ പേര്, സംശയാസ്പദമായ വോട്ടർ എൻട്രികൾ സോഫ്റ്റ്‌വെയർ സ്വയം കണ്ടെത്തുമോ, നിർമ്മിതബുദ്ധി (എഐ) ഇതിന്റെ ഭാഗമായി ഉപയോഗിക്കുന്നുണ്ടോ തുടങ്ങിയ കാര്യങ്ങളായിരുന്നു അപേക്ഷകൻ പ്രധാനമായും ആരാഞ്ഞത്. എന്നാൽ സോഫ്റ്റ്‌വെയറുമായി ബന്ധപ്പെട്ട ഒരു ചോദ്യത്തിനും വിവരങ്ങൾ നൽകാൻ സാധിക്കില്ലെന്ന മറുപടിയാണ് കമ്മീഷൻ രേഖാമൂലം നൽകിയത്.
നേരത്തെ തെരഞ്ഞെടുപ്പ് കമ്മീഷനിലെ തന്നെ രണ്ട് കമ്മീഷണർമാർ ഈ സോഫ്റ്റ്‌വെയറിനെതിരെ എതിർപ്പ് ഉന്നയിച്ചിരുന്നു. സോഫ്റ്റ്‌വെയറിലെ പല ഓപ്ഷനുകളും വിവിധ രീതിയിലുള്ള ക്രമക്കേടുകൾ നടത്താൻ ഇടയാക്കുന്നതാണെന്ന ഗുരുതര ആക്ഷേപമായിരുന്നു ഇവർ ചൂണ്ടിക്കാണിച്ചിരുന്നത്.
