ന്യൂഡൽഹി: 'അർണബ്' അതിതീവ്ര ചുഴലിക്കാറ്റായി മാറിയെന്നും ബുധനാഴ്ച (ഒക്ടോബർ 28) രാവിലെയോടെ ആന്ധ്രാപ്രദേശിലെ ബാപ്പട്ലയ്ക്കും വിശാഖപട്ടണത്തിനും ഇടയിൽ മണിക്കൂറിൽ 140 കിലോമീറ്റർ വരെ വേഗതയിൽ കരതൊടുമെന്നും കേന്ദ്ര കാലാവസ്ഥാ വകുപ്പ് (ഐഎംഡി). വിശാഖപട്ടണത്തുനിന്ന് 490 കിലോമീറ്ററും കാക്കിനാഡയിൽനിന്ന് 560 കിലോമീറ്ററും ബാപ്പട്ലയിൽനിന്ന് 730 കിലോമീറ്ററും അകലെ കേന്ദ്രീകരിച്ചിരിക്കുന്ന ചുഴലിക്കാറ്റ്, നിലവിൽ മണിക്കൂറിൽ 17 കിലോമീറ്റർ വേഗതയിൽ പടിഞ്ഞാറ് ദിശയിലാണ് നീങ്ങുന്നത്. ചുഴലിക്കാറ്റ് ഭീഷണിയെത്തുടർന്ന് ഒക്ടോബർ 27, 28 തീയതികളിലായി വിജയവാഡ, രാജമുണ്ട്രി, മച്ചിലിപട്ടണം, നരസാപൂർ, ഭീമാവരം, കാക്കിനാഡ പോർട്ട്, ഗുണ്ടൂർ, വിശാഖപട്ടണം റൂട്ടുകളിലൂടെ ഓടേണ്ടിയിരുന്ന 53 ട്രെയിനുകൾ പൂർണ്ണമായി റദ്ദാക്കി.
അതിശക്തമായ കാറ്റും കനത്ത മഴയും പ്രതീക്ഷിക്കുന്ന പശ്ചാത്തലത്തിൽ ആന്ധ്രാപ്രദേശിലെ 20 ജില്ലകൾക്കായി മുഖ്യമന്ത്രി എൻ. ചന്ദ്രബാബു നായിഡു 27 കോടി രൂപയുടെ അടിയന്തര ദുരിതാശ്വാസ ഫണ്ട് അനുവദിച്ചു. പ്രളയസാധ്യതയുള്ള താഴ്ന്ന പ്രദേശങ്ങളിൽനിന്ന് ജനങ്ങളെ ഒഴിപ്പിക്കാനും 4,711 ഗർഭിണികളെ സുരക്ഷിതമായ ആരോഗ്യകേന്ദ്രങ്ങളിലേക്ക് മാറ്റാനും നിർദ്ദേശമുണ്ട്; കടലിൽ പോയിരുന്ന 30,043 മത്സ്യബന്ധന ബോട്ടുകൾ ഇതിനകം സുരക്ഷിതമായി തുറമുഖങ്ങളിൽ തിരിച്ചെത്തിയിട്ടുണ്ട്.
രക്ഷാപ്രവർത്തനങ്ങൾക്കായി മേഖലയിൽ 15 എൻഡിആർഎഫ് സംഘങ്ങളെ വിന്യസിച്ചു. മത്സ്യത്തൊഴിലാളികൾ കടലിൽ പോകുന്നത് പൂർണ്ണമായി നിരോധിച്ചതിനൊപ്പം ആന്ധ്രയിലെയും ഒഡീഷയിലെ ആറ് തെക്കൻ ജില്ലകളിലെയും അപകടസാധ്യതയുള്ള പ്രദേശങ്ങളിലെ വിദ്യാലയങ്ങൾക്ക് അവധി പ്രഖ്യാപിക്കുകയും തീരദേശവാസികളെ സുരക്ഷിത കേന്ദ്രങ്ങളിലേക്ക് മാറ്റുകയും ചെയ്തിട്ടുണ്ട്.
