ചെന്നൈ: തമിഴ്നാട് തേനി ആണ്ടിപ്പെട്ടി സബ് ജയിലിൽ സുരക്ഷാ ജീവനക്കാരെ ക്രൂരമായി ആക്രമിച്ച് 17 വിചാരണത്തടവുകാർ രക്ഷപ്പെട്ടു. രക്ഷപ്പെട്ടവരിൽ ഭൂരിഭാഗവും വിഴുപുരം സ്വദേശികളാണ്. ഇവരിലൊരാളെ ജയിലിനടുത്തുള്ള കാട്ടിൽനിന്ന് പോലീസ് പിടികൂടി; ബാക്കിയുള്ളവർക്കായി തിരച്ചിൽ ഊർജ്ജിതമാക്കിയിട്ടുണ്ട്.
തടവുകാർ ഇടുക്കി വഴി കേരളത്തിലേക്ക് കടക്കാൻ സാധ്യതയുണ്ടെന്ന വിവരത്തെത്തുടർന്ന് കേരള-തമിഴ്നാട് അതിർത്തി ചെക്ക്പോസ്റ്റുകളിൽ അതീവ ജാഗ്രതാ നിർദ്ദേശം നൽകുകയും വാഹനപരിശോധന കർശനമാക്കുകയും ചെയ്തു. പ്രതികളുടെ ചിത്രങ്ങളും മറ്റു വിവരങ്ങളും സമീപത്തെ സ്റ്റേഷനുകളിലേക്ക് കൈമാറിയിട്ടുണ്ട്.
ഒറ്റ സെല്ലിൽ പാർപ്പിച്ചിരുന്ന തടവുകാരിൽ ഒരാൾക്ക് അസുഖമാണെന്ന് കള്ളം പറഞ്ഞ് സുരക്ഷാ ഉദ്യോഗസ്ഥരെ അകത്തേക്ക് വിളിച്ചുവരുത്തിയാണ് ആക്രമണം നടത്തിയത്. നാല് പോലീസുകാർക്ക് നേരെ നടന്ന ആക്രമണത്തിൽ തങ്കപാണ്ടി എന്ന പോലീസുകാരന്റെ തലയ്ക്ക് ഗുരുതരമായി പരിക്കേറ്റു; ഇദ്ദേഹത്തെ സമീപത്തെ ആശുപത്രിയിൽ പ്രവേശിപ്പിച്ചു. മറ്റ് രണ്ട് പോലീസുകാർക്കും പരിക്കേറ്റിട്ടുണ്ട്.
