ന്യൂഡൽഹി: ഇന്ത്യയും അമേരിക്കയും തമ്മിലുള്ള ചരിത്രപരമായ ഉഭയകക്ഷി വ്യാപാര കരാർ ഉടൻ യാഥാർത്ഥ്യമാകുമെന്ന് വ്യക്തമാക്കിക്കൊണ്ട് കേന്ദ്ര വിദേശകാര്യ മന്ത്രി എസ്. ജയശങ്കറും യുഎസ് സ്റ്റേറ്റ് സെക്രട്ടറി മാർക്കോ റൂബിയോയും മുംബൈയിൽ കൂടിക്കാഴ്ച നടത്തി. ചെറിയ ചില സാങ്കേതിക വിഷയങ്ങൾ മാത്രമാണ് ഇനി പരിഹരിക്കാനുള്ളതെന്നും, ഉടൻ തന്നെ ശുഭവാർത്ത പ്രഖ്യാപിക്കാൻ സാധിക്കുമെന്നും റൂബിയോ പറഞ്ഞു.
ഊർജ്ജം, പ്രതിരോധം, സാങ്കേതികവിദ്യ എന്നീ മേഖലകളിലെ സഹകരണത്തിനൊപ്പം ഉഭയകക്ഷി വ്യാപാര കരാറുമായി ബന്ധപ്പെട്ട ചർച്ചകളിലെ പുരോഗതിയെ ഇരുനേതാക്കളും സ്വാഗതം ചെയ്തതായി വിദേശകാര്യ മന്ത്രാലയം അറിയിച്ചു. ഇന്ത്യയുടെ ഊർജ്ജ-പ്രതിരോധ വിതരണ സ്രോതസ്സുകൾ കൂടുതൽ വൈവിധ്യവത്കരിക്കുന്നതിൽ യുഎസിന് വഹിക്കാനാകുന്ന പങ്കിന് റൂബിയോ ഊന്നൽ നൽകിയപ്പോൾ, കുടിയേറ്റം, എച്ച്-1ബി വിസ തുടങ്ങിയ ഭരണപരമായ വിഷയങ്ങളിലെ ഇന്ത്യയുടെ ആശങ്കകൾ ജയശങ്കർ ചർച്ചയിൽ ഉന്നയിച്ചു. തന്ത്രപരമായ പങ്കാളിത്തം കൂടുതൽ ശക്തിപ്പെടുത്തേണ്ടതുണ്ടെന്ന് ഇരുപക്ഷവും എക്സിലൂടെ വ്യക്തമാക്കി.
ഈ മാസം അവസാനം അറ്റ്ലാന്റയിൽ ചേരുന്ന ജി20 വിദേശകാര്യമന്ത്രിമാരുടെ സമ്മേളനത്തിലും, ജപ്പാൻ, ഓസ്ട്രേലിയ എന്നിവർ ഉൾപ്പെടുന്ന 'ക്വാഡ്' ഉച്ചകോടിയിലും ഇരുവരും വീണ്ടും കൂടിക്കാഴ്ച നടത്തും.
