ന്യൂഡൽഹി: ഡൽഹിയിൽ പ്രതിപക്ഷ പ്രതിഷേധങ്ങൾ ശക്തമാകുന്നതിനിടെ രാഹുൽ ഗാന്ധി വിദേശയാത്ര നടത്തുന്നതിനെതിരെ രൂക്ഷ പരിഹാസവുമായി ബിജെപി. വിമാനത്തിൽ വിയറ്റ്നാമിലേക്ക് യാത്ര ചെയ്യുന്ന രാഹുൽ ഗാന്ധിയുടെ ദൃശ്യങ്ങൾ സഹയാത്രികൻ പുറത്തുവിട്ടതിന് പിന്നാലെയാണ് ബിജെപി വക്താവ് പ്രദീപ് ഭണ്ഡാരി വിമർശനവുമായി രംഗത്തെത്തിയത്. സ്വന്തം പ്രക്ഷോഭങ്ങളോട് പോലും ആത്മാർത്ഥതയില്ലാത്ത പാർട്ട് ടൈം രാഷ്ട്രീയക്കാരനാണ് രാഹുലെന്ന് അദ്ദേഹം കുറ്റപ്പെടുത്തി.
ജോലി ചെയ്യുന്നതിനേക്കാൾ കൂടുതൽ സമയം രാഹുൽ ഗാന്ധി അവധി ആഘോഷങ്ങൾക്കായാണ് മാറ്റിവെക്കുന്നതെന്ന് ബിജെപി പരിഹസിച്ചു. വിദേശത്ത് പോയി വിശ്രമജീവിതം നയിച്ച ശേഷം വോട്ട് ചോരി ആരോപണങ്ങൾ ഉന്നയിച്ചിട്ട് എന്ത് കാര്യമാണുള്ളതെന്നും നേതൃത്വം ചോദിച്ചു.
നവംബർ ഒന്നിന് ഡൽഹി രാംലീല മൈതാനിയിൽ ഇന്ത്യ സഖ്യത്തിന്റെ വിപുലമായ റാലിയും, ഇതിന് മുന്നോടിയായി ഒക്ടോബർ 25-ന് റാലികളും ആസൂത്രണം ചെയ്തിരിക്കുന്ന ഘട്ടത്തിലാണ് പ്രതിപക്ഷ നേതാവ് വിദേശത്തേക്ക് തിരിച്ചത്.
