ന്യൂഡൽഹി:സാമ്പത്തിക ഭദ്രതയും ഉയർന്ന കരിയറും ഉപേക്ഷിച്ച് രാജ്യത്തിന്റെ നന്മയ്ക്കായി തെരുവിലിറങ്ങി ഒടുവിൽ ജയിൽവാസം വരെ വരിക്കേണ്ടി വന്നവരാണ് സിജെപി നേതാക്കളായ അശുതോഷ് റാങ്കയും സൗരവ് ദാസുമെന്ന് സംഘടനയുടെ സ്ഥാപകൻ അഭിജീത് ദീപ്‌കെ. മികച്ച സാഹചര്യങ്ങളിൽ നിന്ന് വന്നിട്ടും മറ്റുള്ള മനുഷ്യർക്കായി സർവ്വതും ത്യജിച്ച് പോരാട്ടരംഗത്തേക്ക് ഇറങ്ങിയ ഇരുവരെയും പ്രകീർത്തിച്ച് എക്സിലൂടെ പങ്കുവെച്ച കുറിപ്പിലാണ് അദ്ദേഹം ഇക്കാര്യം വ്യക്തമാക്കിയത്.
വർഷങ്ങൾക്ക് മുമ്പ് ലണ്ടനിൽ ഉയർന്ന ശമ്പളമുള്ള കോർപ്പറേറ്റ് ജോലി ലഭിച്ച വ്യക്തിയാണ് അശുതോഷെന്നും, സൗരവ് രാജ്യത്തെ നിയമവ്യവസ്ഥയെക്കുറിച്ച് എഴുതി സുരക്ഷിതമായ ജീവിതം നയിക്കുകയായിരുന്നുവെന്നും ദീപ്‌കെ ഓർമ്മിപ്പിച്ചു. സുഖകരമായ ജീവിതം നയിക്കാനും അന്യരുടെ പ്രശ്നങ്ങളെക്കുറിച്ച് ചിന്തിക്കാതിരിക്കാനും അവസരമുണ്ടായിരുന്നിട്ടും, രാജ്യം കൂടുതൽ മികച്ചതാകുമെന്ന പ്രതീക്ഷയിൽ അനിശ്ചിതത്വങ്ങളിലേക്ക് ഇറങ്ങിച്ചെല്ലാൻ ഇരുവരും യാതൊരു മടിയും കാട്ടിയില്ലെന്ന് അദ്ദേഹം ചൂണ്ടിക്കാട്ടി.
തങ്ങളുടേതല്ലാത്ത പോരാട്ടങ്ങളിൽ പങ്കുചേരുകയും അറിയാത്ത മനുഷ്യരുടെ മെച്ചപ്പെട്ട ജീവിതത്തിനായി സ്വന്തം ജീവിതം പണയപ്പെടുത്തുകയും ചെയ്യുന്ന അത്യപൂർവ്വ മനുഷ്യത്വപരമായ ഗുണമാണ് ഇരുവരുടെയും ഏറ്റവും വലിയ പ്രത്യേകതയെന്നും ദീപ്‌കെ കൂട്ടിച്ചേർത്തു.
