ന്യൂഡൽഹി: സിജെപി നേതാക്കളായ സൗരവ് ദാസിന്റെയും അശുതോഷ് റാങ്കയുടെയും ജുഡീഷ്യൽ കസ്റ്റഡി നീട്ടിയതിന് പിന്നാലെ കേന്ദ്ര സർക്കാരിനെയും പ്രധാനമന്ത്രി നരേന്ദ്ര മോദിയെയും രൂക്ഷമായി വിമർശിച്ച് അഭിജീത് ദീപ്കെ രംഗത്ത്. സമൂഹമാധ്യമങ്ങളിൽ പങ്കുവെച്ച വീഡിയോയിലൂടെയാണ് യുവ പ്രക്ഷോഭകരെ ഭയപ്പെടുത്താൻ സർക്കാർ സംവിധാനങ്ങളെ ദുരുപയോഗം ചെയ്യുകയാണെന്ന് അദ്ദേഹം കുറ്റപ്പെടുത്തിയത്.
ജന്തർ മന്തറിൽ ദേശീയ പതാക ഉയർത്താൻ പോയ ഇരുനേതാക്കളെയും ജുഡീഷ്യൽ കസ്റ്റഡിയിലേക്ക് അയക്കുകയാണുണ്ടായതെന്നും കോടതി നടപടികൾ മാറ്റിവെക്കുകയാണെന്നും ദീപ്കെ ആരോപിച്ചു. 26 വയസ്സുള്ള ചെറുപ്പക്കാരെ തടവിലാക്കുന്നതിലൂടെയും തെരുവിൽ വിദ്യാർത്ഥികളെ മർദ്ദിക്കുകയും വലിച്ചിഴയ്ക്കുകയും ചെയ്യുന്നതിലൂടെയും ഭരണകൂടം ശക്തി തെളിയിക്കുകയല്ല ചെയ്യുന്നതെന്നും, പോലീസിനും കോടതിക്കും പിന്നിൽ ഒളിച്ചിരിക്കുന്ന പ്രധാനമന്ത്രി വെറുമൊരു ഭീരുവാണെന്നും അദ്ദേഹം പരിഹസിച്ചു.
അഞ്ച് ദിവസത്തെ ജയിൽവാസത്തിന് ശേഷവും കോടതിയിലെത്തിയപ്പോഴും കസ്റ്റഡി കാലാവധി നീട്ടിയപ്പോഴും തെല്ലും ഭയം കാട്ടാതെ ചിരിച്ച സൗരവ് ദാസിനെയും ഒപ്പം അശുതോഷിനെയും കുടുംബങ്ങളെയും ദീപ്കെ പ്രശംസിച്ചു. അറസ്റ്റിലൂടെയും തടവിലൂടെയും ആരെയും നിശബ്ദരാക്കാനോ യുവ പ്രതിഷേധക്കാരെ പിന്തിരിപ്പിക്കാനോ കഴിയില്ലെന്നും, ജയിലിലടച്ചതുകൊണ്ട് തങ്ങൾ നിശബ്ദരാകില്ലെന്നും അദ്ദേഹം വ്യക്തമാക്കി.
