ന്യൂഡൽഹി: ഉത്തർപ്രദേശ് നിയമസഭാ തെരഞ്ഞെടുപ്പിൽ ബിജെപി ടിക്കറ്റിലോ സ്വതന്ത്രനായോ മത്സരിക്കാൻ ആഗ്രഹം പ്രകടിപ്പിച്ച കൊലപാതകക്കേസ് പ്രതി നന്ദലാൽ റായി എന്ന ബാബ്ലൂ റായിയുടെ ജീവപര്യന്തം തടവുശിക്ഷ അലഹബാദ് ഹൈക്കോടതി സ്റ്റേ ചെയ്തു. ശിക്ഷിക്കപ്പെടുന്നതിന് മുൻപ് ഇയാൾ രാഷ്ട്രീയ പ്രവർത്തകനും ബിജെപി പ്രവർത്തകനുമായിരുന്നുവെന്ന് ചൂണ്ടിക്കാട്ടിയാണ് ജസ്റ്റിസ് സിദ്ധാർത്ഥ്, ജസ്റ്റിസ് വിനയ് കുമാർ ദ്വിവേദി എന്നിവരടങ്ങുന്ന ബെഞ്ച് പ്രതിക്ക് ജാമ്യം അനുവദിച്ചത്. കേസിലെ കൂട്ടുപ്രതിയായ ശേഷാന്ത് ശർമയുടെ അപ്പീലിലും കോടതി ജാമ്യം നൽകിയിട്ടുണ്ട്.
സാധാരണക്കാരന് ഉപജീവനമാർഗ്ഗം കണ്ടെത്താനുള്ള അവകാശത്തേക്കാൾ താഴെയല്ല ഒരു രാഷ്ട്രീയക്കാരന് തെരഞ്ഞെടുപ്പിൽ മത്സരിക്കാനുള്ള അവകാശമെന്ന് നിരീക്ഷിച്ചാണ് കോടതി ശിക്ഷ സ്റ്റേ ചെയ്തത്. അപ്പീലിൽ അന്തിമവിധി വരുന്നത് അതിജീവിക്കാൻ ഹർജിക്കാരന് സാധിക്കട്ടെയെന്നും ബെഞ്ച് ഉത്തരവിൽ വ്യക്തമാക്കി.
2017-ൽ സിഗ്രയിലെ വഴിയോരത്ത് തുണിക്കച്ചവടം നടത്തിയിരുന്ന 51-കാരനായ പ്രമോദ് കുമാർ നിഗത്തെ മത്സ്യവ്യാപാരിയായ നന്ദലാൽ റായിയുമായുള്ള തർക്കത്തെ തുടർന്ന് വെടിവെച്ച് കൊലപ്പെടുത്തിയെന്നാണ് കേസ്. കൊല്ലപ്പെട്ടയാളുടെ മകൻ ഹിമാൻഷു നൽകിയ പരാതിയിൽ കഴിഞ്ഞ വർഷം ഏപ്രിൽ 15-നാണ് വാരാണസി കോടതി പ്രതികൾക്ക് ജീവപര്യന്തം തടവുശിക്ഷ വിധിച്ചിരുന്നത്.
