ഡൽഹി: ഭരണം ജനവിരുദ്ധമാകുമ്പോൾ ജനങ്ങൾ ഭരണമാറ്റത്തിനായി രംഗത്തിറങ്ങുമെന്ന് മോദി സർക്കാരിനെ വിമർശിച്ച് പ്രകാശ് രാജ്. വീടുകളിൽ ത്രിവർണ്ണ പതാക ഉയർത്താൻ പ്രചാരണം നടത്തിയവർ ഇപ്പോൾ ദേശീയ പതാകയെ ഭയപ്പെടുകയാണെന്നും ത്രിവർണ്ണ പതാകയുമായി എത്തിയവരെ കസ്റ്റഡിയിലെടുക്കുന്ന നടപടി തെറ്റാണെന്നും അദ്ദേഹം വ്യക്തമാക്കി. മോദിയും അമിത് ഷായും ഭയത്തിലാണെന്നും അഭിജിത്ത് ദീപ്കെ, നേഹ ബോറ എന്നിവരെ കസ്റ്റഡിയിലെടുത്ത സാഹചര്യത്തിൽ സൈന്യത്തെ അയച്ചാലും പ്രതിഷേധം തുടരുമെന്നും യുവാക്കളാണ് ഈ സമരത്തെ മുന്നിൽ നിന്ന് നയിക്കുന്നതെന്നും അദ്ദേഹം പറഞ്ഞു.
ജന്തർ മന്തറിലെ സമരം വിലക്കിയെങ്കിലും പ്രതിഷേധങ്ങൾ പുതിയ ഇടങ്ങളിൽ രൂപപ്പെട്ടുവെന്നും രാജ്യത്തിനകത്തുനിന്നും വിദേശത്തുനിന്നും ആളുകൾ ഇത് ശ്രദ്ധിക്കുന്നുണ്ടെന്നും പ്രകാശ് രാജ് ചൂണ്ടിക്കാട്ടി. സ്ത്രീപീഡകർക്ക് ജാമ്യം അനുവദിക്കുകയും യുവാക്കളെ തടവിലാക്കുകയും ചെയ്യുന്ന സമീപനത്തിലൂടെ ജനാധിപത്യത്തെയും ഭരണഘടനയെയും തകർക്കാനാണ് സർക്കാർ ശ്രമിക്കുന്നതെന്നും അദ്ദേഹം ആരോപിച്ചു.
ബാല്യകാലത്ത് മുതലയെ പിടിച്ചെന്ന് അവകാശപ്പെട്ട മോദിക്ക് ഇപ്പോൾ പാറ്റകളെ പേടിയാണെന്നും 'റീൽസ് കിംഗ്' ആണെന്നും നരേന്ദ്രമോദിയുടെ 'ഫ്രണ്ട്‌സ് റീൽ' പരാമർശിച്ചുകൊണ്ട് അദ്ദേഹം പരിഹസിച്ചു. സ്വാതന്ത്ര്യസമര പോരാട്ടത്തിൽ പങ്കില്ലാത്ത ആർഎസ്എസും ബിജെപിയുമാണ് വന്ദേമാതരത്തിനായി വാദിക്കുന്നതെന്നും, യഥാർത്ഥ രാജ്യദ്രോഹികൾ മോദിയും അമിത് ഷായും ബിജെപിയുമാണെന്ന് തുറന്നുപറയണമെന്നും രാജ്യവ്യാപകമായി പടരുന്ന സമരത്തിലൂടെ രാജ്യം വീണ്ടെടുക്കപ്പെടുമെന്നും പ്രകാശ് രാജ് കൂട്ടിച്ചേർത്തു.
