ന്യൂഡൽഹി: ട്രെയിനുകളിലും പ്ലാറ്റ്‌ഫോം ഉൾപ്പെടെയുള്ള റെയിൽവേ പരിസരങ്ങളിലും ഇയർഫോൺ ഉപയോഗിക്കാതെ ഉച്ചത്തിൽ പാട്ടുവെക്കുന്നതും സ്പീക്കറിലിട്ട് വീഡിയോ കാണുന്നതും സംസാരിക്കുന്നതും കുറ്റകരമാക്കി റെയിൽവേ വിജ്ഞാപനമിറക്കി. സഹയാത്രികരുടെ സ്വകാര്യതയും സുരക്ഷിത യാത്രയും ഉറപ്പുവരുത്തുന്നതിനായി ജൻ വിശ്വാസ് ഭേദഗതി പ്രകാരമുള്ള റെയിൽവേ ആക്ടിലെ സെക്ഷൻ 145 (2) (a) വകുപ്പ് പ്രകാരമാണ് പുതിയ നടപടി.
മൊബൈൽ ഫോണുകൾ സ്പീക്കർ മോഡിലിട്ട് ബുദ്ധിമുട്ടുണ്ടാക്കുന്ന യാത്രക്കാരിൽ നിന്ന് 1,000 രൂപ തൽക്ഷണ പിഴ ഈടാക്കുകയും ഇവരെ റെയിൽവേ പരിസരത്തുനിന്ന് പുറത്താക്കുകയും ചെയ്യും.
റെയിൽവേ ഉദ്യോഗസ്ഥരുടെ മുന്നറിയിപ്പ് അവഗണിച്ച് നിയമലംഘനം തുടരുന്നവർക്കെതിരെ 6 മാസം വരെ തടവോ 5,000 രൂപ പിഴയോ ലഭിക്കാവുന്ന കർശന വകുപ്പുകൾ ചുമത്തി കോടതിയിലേക്ക് കൈമാറുമെന്നും റെയിൽവേ വ്യക്തമാക്കുന്നു.
