ന്യൂഡൽഹി: തിരഞ്ഞെടുപ്പ് കമ്മീഷനെതിരായ (ഇസിഐ) പ്രക്ഷോഭങ്ങൾക്കിടെ വനിതകൾക്കും ട്രാൻസ്ജെൻഡർ സമരക്കാർക്കും നേരെ ലൈംഗികാതിക്രമങ്ങളും അതിക്രമങ്ങളും കാട്ടിയ പൊലീസ് ഉദ്യോഗസ്ഥർക്കെതിരെ കർശന നടപടി ആവശ്യപ്പെട്ട് വനിതാ സംഘടനകൾ ശനിയാഴ്ച ഡൽഹി പൊലീസ് ആസ്ഥാനത്തേക്ക് മാർച്ച് നടത്തി. കുറ്റക്കാരായ പൊലീസുകാർക്കെതിരെ അച്ചടക്ക-നിയമ നടപടികൾ സ്വീകരിക്കണമെന്ന് ആവശ്യപ്പെട്ട് നിവേദനം നൽകാനായിരുന്നു സമരം.
ബംഗ്ലാ സാഹിബ് ഗുരുദ്വാരയ്ക്ക് സമീപത്തുനിന്ന് ആരംഭിച്ച മാർച്ചിൽ പ്ലക്കാർഡുകളും ബാനറുകളുമേന്തിയാണ് പ്രതിഷേധക്കാർ അണിനിരന്നത്. 'നിങ്ങൾക്ക് ഭീഷണിപ്പെടുത്താം, എന്നാൽ നിശബ്ദരാക്കാനാവില്ല' എന്ന മുദ്രാവാക്യങ്ങൾ മുഴക്കിയ സമരക്കാർ, 'എല്ലാത്തരം ചൂഷണങ്ങളിൽ നിന്നും അടിച്ചമർത്തലുകളിൽ നിന്നും സ്ത്രീകൾ മോചനം ആഗ്രഹിക്കുന്നു' എന്നെഴുതിയ പ്ലക്കാർഡുകൾ ഉയർത്തി ലിംഗാധിഷ്ഠിത അതിക്രമങ്ങൾക്കും പൊലീസ് നടപടികൾക്കുമെതിരെ ശക്തമായ പ്രതിഷേധം രേഖപ്പെടുത്തി.
തുടർന്ന് റോഡ് ഉപരോധിച്ച പ്രതിഷേധക്കാരുടെ പ്രതിനിധികൾ അഡീഷണൽ ഡെപ്യൂട്ടി കമ്മീഷണർ ഓഫ് പൊലീസ് ജഗ്ദേവ് സിംഗുമായി കൂടിക്കാഴ്ച നടത്തിയതായി ഫെമിനിസ്റ്റ്, ക്വിയർ, വനിതാ കൂട്ടായ്മകളുടെ പ്രതിനിധി സംഘത്തിലെ ഒരംഗം എക്‌സിലൂടെ അറിയിച്ചു.
