ലണ്ടൻ/ന്യൂഡൽഹി: ലണ്ടനിലെ ഇന്ത്യൻ ഹൈക്കമ്മീഷന് മുന്നിൽ കോൺഗ്രസ് അനുകൂല വിദ്യാർത്ഥി സംഘടനയായ എൻഎസ്‌യുഐ നടത്തിയ പ്രതിഷേധത്തിനെതിരെ പ്രധാനമന്ത്രി നരേന്ദ്ര മോദിക്ക് പിന്തുണ പ്രഖ്യാപിച്ച് ഇന്ത്യൻ പ്രവാസി സമൂഹം വെള്ളിയാഴ്ച പ്രകടനം നടത്തി. അതേസമയം, രാജ്യതലസ്ഥാനമായ ഡൽഹിയിൽ നടന്ന വിവിധ റാലികളിൽ പങ്കെടുത്ത നൂറ്റമ്പതോളം പ്രതിഷേധക്കാരെ പോലീസ് കസ്റ്റഡിയിലെടുത്തു.
കൊണാട്ട് പ്ലേസിലെ സെൻട്രൽ പാർക്കിൽ 'ലഹ്‌റാ ദോ തിരംഗ' റാലിക്ക് ആഹ്വാനം നൽകിയ ആക്ടിവിസ്റ്റ് അഭിജീത് ദീപ്കെ ഉൾപ്പെടെയുള്ളവരാണ് മാണ്ഡി ഹൗസിനും കൊണാട്ട് പ്ലേസിനും സമീപത്തുനിന്ന് പിടിയിലായത്.
തിരഞ്ഞെടുപ്പ് ക്രമക്കേടുകൾ ആരോപിച്ച് തിരഞ്ഞെടുപ്പ് കമ്മീഷനെതിരെ ആം ആദ്മി പാർട്ടി പ്രവർത്തകർ തിരംഗ റാലി സംഘടിപ്പിച്ചപ്പോൾ, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കണമെന്ന് ആവശ്യപ്പെട്ട് ഐസയും ഇടത് സംഘടനകളും തലസ്ഥാനത്ത് തെരുവിലിറങ്ങി.
