ന്യൂഡൽഹി: ദേശീയപതാക ഉയർത്തിയതിന്റെ പേരിൽ സ്വാതന്ത്ര്യത്തിന് മുൻപാണ് ആളുകളെ ഇത്തരത്തിൽ കസ്റ്റഡിയിലെടുത്തിട്ടുള്ളതെന്നും നിലവിലെ കേന്ദ്ര സർക്കാർ ബ്രിട്ടീഷുകാരെക്കാൾ കഷ്ടമാണെന്നും ആം ആദ്മി പാർട്ടി നേതാവ് ആതിഷി. ജന്തർമന്തറിൽ ത്രിവർണ്ണ പതാക ഉയർത്തിയതിന് സൗരവ് ദാസിനെയും അശുതോഷ് റാങ്കയെയും അതീവ സുരക്ഷാ ജയിലിൽ അടച്ച നടപടിയെ അപലപിച്ച് സമൂഹമാധ്യമമായ 'എക്സി'ലൂടെ പ്രതികരിക്കുകയായിരുന്നു അവർ.
പതാകയേന്തിയതിന് അഭിജീത് ദീപ്കെ, നേഹ ബോറ എന്നിവരടക്കം നൂറുകണക്കിന് ആളുകളെയാണ് പോലീസ് തടങ്കലിൽ വെച്ചിരിക്കുന്നത്.
അധികാരം നിലനിർത്താൻ മോദി-ഷാ കൂട്ടുകെട്ടിന് ഏത് അറ്റം വരെയും പോകാമെന്ന അവസ്ഥയാണെന്ന് കുറ്റപ്പെടുത്തിയ ആതിഷി, ബ്രിട്ടീഷുകാരെക്കാൾ മോശമായാണ് കേന്ദ്ര ഭരണകൂടം ഇപ്പോൾ പെരുമാറുന്നതെന്നും കൂട്ടിച്ചേർത്തു.
