വാഷിങ്ടൺ: അടുത്തയാഴ്ച ഇന്ത്യ സന്ദർശിക്കാനിരിക്കെ, രാജ്യത്ത് നടക്കുന്ന പ്രതിഷേധങ്ങളോട് അധികൃതർ പുലർത്തുന്ന സമീപനം കേന്ദ്ര സർക്കാരുമായുള്ള ചർച്ചയിൽ ഉന്നയിക്കണമെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോയോട് ആവശ്യപ്പെട്ട് യുഎസ് ജനപ്രതിനിധികൾ. കോൺഗ്രസ് അംഗങ്ങളായ പ്രമീള ജയപാലും ജിം മക്ഗവർണറുമാണ് ഇതുസംബന്ധിച്ച് റൂബിയോയ്ക്ക് സംയുക്തമായി കത്തയച്ചത്.
ലോകത്തെ പ്രമുഖ ജനാധിപത്യ രാജ്യങ്ങളെന്ന നിലയിൽ അഭിപ്രായസ്വാതന്ത്ര്യവും കൂട്ടംകൂടാനുള്ള അവകാശവും സംരക്ഷിക്കാനും പ്രോത്സാഹിപ്പിക്കാനും അമേരിക്കയ്ക്കും ഇന്ത്യക്കും ബാധ്യതയുണ്ടെന്ന് ഇരുവരും ചൂണ്ടിക്കാട്ടി.
വരുംദിവസങ്ങളിൽ ഇന്ത്യൻ ഉദ്യോഗസ്ഥരുമായി നടത്തുന്ന കൂടിക്കാഴ്ചകളിൽ മനുഷ്യാവകാശങ്ങൾക്കും പൗരസ്വാതന്ത്ര്യത്തിനും മുൻഗണന നൽകണമെന്ന് മാർക്കോ റൂബിയോയോട് ആവശ്യപ്പെടുന്നതായി ജനപ്രതിനിധി ജിം മക്ഗവർണറെ പരാമർശിച്ചുകൊണ്ട് പ്രമീള ജയപാൽ വ്യക്തമാക്കി.
