ന്യൂഡൽഹി: കേന്ദ്ര ആഭ്യന്തരമന്ത്രി അമിത് ഷായുടെ കീഴിലുള്ള ഡൽഹി പോലീസ് തലസ്ഥാനത്ത് ഗുണ്ടാരാജ് സ്ഥാപിക്കുകയാണെന്ന് എഐസിസി വക്താവ് പവൻ ഖേര. 'എക്സി'ലൂടെ അദ്ദേഹം ആഭ്യന്തര മന്ത്രാലയത്തിനെതിരെ രൂക്ഷവിമർശനം ഉന്നയിച്ചത്.
നേഹ ബോറയെയും കൂട്ടാളികളെയും വൈകിയ വേളയിലും തടങ്കലിൽ വെച്ചതും പാർപ്പിച്ചിരിക്കുന്ന സ്ഥലം വ്യക്തമാക്കാത്തതും പൂർണ്ണമായും നിയമവിരുദ്ധമാണെന്ന് അദ്ദേഹം കുറ്റപ്പെടുത്തി. രാത്രിയുടെ മറവിൽ കള്ളന്മാരെയും കൊള്ളക്കാരെയും പോലെ പ്രവർത്തിക്കുന്നത് ഡൽഹി പോലീസിന് ശീലമായി മാറിയിരിക്കുകയാണെന്ന് ഖേര ആരോപിച്ചു. മുൻപ് അങ്കിത ഭണ്ഡാരിക്ക് നീതി ആവശ്യപ്പെട്ടുള്ള പ്രതിഷേധത്തിനിടെ തങ്ങളെയും ഇതേരീതിയിൽ അർദ്ധരാത്രിയിൽ അന്യായമായി കസ്റ്റഡിയിലെടുത്ത കാര്യം അദ്ദേഹം ചൂണ്ടിക്കാട്ടി. കേന്ദ്ര സർക്കാരിനെ അധികാരത്തിൽ നിന്ന് മാറ്റേണ്ടത് എന്തുകൊണ്ടാണെന്ന് ഇത്തരം ഏകാധിപത്യ നടപടികൾ വ്യക്തമാക്കുന്നുണ്ടെന്നും വ്യക്തമാക്കി.
ഡൽഹി പോലീസിന്റെ വിശ്വസ്തതയും ഉത്തരവാദിത്തവും ഭരണഘടനയോടും നിയമത്തോടുമായിരിക്കണമെന്ന് അദ്ദേഹം ഓർമ്മിപ്പിച്ചു. മോദിയും ഷായും ഏതാനും ദിവസത്തേക്ക് മാത്രമുള്ള അതിഥികൾ ആണെന്നും അധികാരം ശാശ്വതമല്ല, മറിച്ച് രാജ്യത്ത് ഭരണഘടനയാണ് പരമോന്നതമെന്നും പവൻ ഖേര കൂട്ടിച്ചേർത്തു.
