തിരുവനന്തപുരം: സിഎംആർഎൽ-എക്സാലോജിക് സാമ്പത്തിക ഇടപാടിൽ എൻഫോഴ്സ്മെന്റ് ഡയറക്ടറേറ്റ് (ഇഡി) എടുക്കുന്ന കേസുകളൊന്നും എവിടേയും എത്താൻ പോകുന്നില്ലെന്നും, ജനങ്ങളുടെ രാഷ്ട്രീയ പ്രവർത്തനങ്ങൾക്ക് തടയിടുക മാത്രമാണ് ഇത്തരം നടപടികളുടെ ലക്ഷ്യമെന്നും മുതിർന്ന മാധ്യമപ്രവർത്തകൻ പ്രബീർ പുരകായസ്ത. കേന്ദ്ര ഏജൻസികളുടെ രാഷ്ട്രീയ വേട്ടക്കെതിരെ സിപിഐഎം സംഘടിപ്പിച്ച സെമിനാറിൽ സംസാരിക്കവെയാണ് അദ്ദേഹം ഇക്കാര്യം വ്യക്തമാക്കിയത്.
കേസുകൾ വരുമ്പോൾ നേതാക്കളും പ്രവർത്തകരും പ്രതിരോധത്തിലേക്ക് മാറുമെന്നും ഒപ്പമുള്ളവർ മാനസിക സമ്മർദ്ദത്തിലാകുമെന്നും ചൂണ്ടിക്കാട്ടിയ അദ്ദേഹം, രാഷ്ട്രീയ പ്രവർത്തനങ്ങളുടെ സ്വാഭാവിക അന്തരീക്ഷം ഇല്ലാതാക്കുകയാണ് ഇഡിയുടെ ഉദ്ദേശ്യമെന്ന് കുറ്റപ്പെടുത്തി. ബിജെപി സർക്കാരിന് അനുകൂലമായ രാഷ്ട്രീയ സാഹചര്യം ഒരുക്കുകയാണ് അന്വേഷണ ഏജൻസികളുടെ ദൗത്യമെന്നും കേസുകളെക്കുറിച്ചുള്ള ഏകപക്ഷീയമായ വിവരങ്ങൾ മാധ്യമങ്ങളിലേക്ക് ചോർത്തി നൽകുന്നത് ഇവർ തന്നെയാണെന്നും അദ്ദേഹം ആരോപിച്ചു.
സ്വതന്ത്ര വാർത്താ പോർട്ടലായ 'ന്യൂസ് ക്ലിക്കി'ന്റെ സ്ഥാപകനും ചീഫ് എഡിറ്ററുമായ പ്രബീർ പുരകായസ്തയ്ക്കെതിരെ ചൈനീസ് അനുകൂല പ്രചാരണത്തിന് വിദേശ ഫണ്ട് കൈപ്പറ്റിയെന്നാരോപിച്ച് ഡൽഹി പോലീസ് സ്പെഷ്യൽ സെൽ ചുമത്തിയ യുഎപിഎ കേസും ഇഡിയുടെ കള്ളപ്പണം വെളുപ്പിക്കൽ കേസും ഉണ്ടായിരുന്നു. എന്നാൽ 2024 മെയ് മാസത്തിൽ അദ്ദേഹത്തിന്റെ അറസ്റ്റ് നിയമവിരുദ്ധമാണെന്ന് പ്രഖ്യാപിച്ച സുപ്രീം കോടതി, ജയിലിൽ നിന്ന് വിട്ടയയ്ക്കാൻ ഉത്തരവിടുകയായിരുന്നു.
