ന്യൂഡൽഹി: തലസ്ഥാനത്തെ സിജെപി സമരം തടയാൻ ഇന്റർനെറ്റ് സേവനങ്ങൾ റദ്ദാക്കിയ നടപടിയിൽ സുപ്രീം കോടതിയിൽ നിരുപാധികം മാപ്പപേക്ഷിച്ച് കേന്ദ്ര സർക്കാർ. കേന്ദ്ര സർക്കാരിനും ഡൽഹി പോലീസിനുമെതിരായ കോടതിയലക്ഷ്യ കേസിൽ ഇന്ന് മറുപടി നൽകാൻ കോടതി നിർദേശിച്ചിരിക്കെ, കേന്ദ്ര ആഭ്യന്തര സെക്രട്ടറി ഗോവിന്ദ് മോഹനാണ് മാപ്പപേക്ഷ സമർപ്പിച്ചത്.
ജനങ്ങളുടെ സഞ്ചാരസ്വാതന്ത്ര്യം ഉറപ്പാക്കണമെന്നും മെട്രോ സ്റ്റേഷനുകൾ അടച്ചിടുകയോ ട്രെയിനുകൾ റദ്ദാക്കുകയോ ചെയ്യരുതെന്നും കോടതി നേരത്തെ ഉത്തരവിട്ടിരുന്നു. എന്നാൽ, കർശന സുരക്ഷയൊരുക്കുന്നതിന്റെ ഭാഗമായി ഈ നിർദേശങ്ങൾ മറികടന്ന് വീണ്ടും ഇന്റർനെറ്റ് നിരോധനം ഏർപ്പെടുത്തിയതിനെതിരെയാണ് അഭിഭാഷക മേനകാ ഗുരുസ്വാമി ഉൾപ്പെടെയുള്ളവർ കോടതിയലക്ഷ്യ നടപടികൾ തുടങ്ങിയത്.
അതേസമയം, നിരുപാധികം മാപ്പ് അപേക്ഷിച്ചതിനൊപ്പം തന്നെ, അടിയന്തര സാഹചര്യങ്ങളിൽ ഇന്റർനെറ്റ് നിയന്ത്രണം ഏർപ്പെടുത്താനുള്ള അനുമതി ലഭിക്കുന്നതിനായി ഒക്ടോബറിലെ വിധിയിൽ മാറ്റം വരുത്തണമെന്ന ആവശ്യവും കേന്ദ്രം സുപ്രീം കോടതിക്ക് മുന്നിൽ ഉന്നയിച്ചിട്ടുണ്ട്.
