ന്യൂഡൽഹി: കേന്ദ്ര അന്വേഷണ ഏജൻസികളെ ഉപയോഗിച്ച് എതിർശബ്ദങ്ങളെ അടിച്ചമർത്തുന്ന നടപടികൾ കേരളത്തിലും ആവർത്തിക്കുമെന്ന് ആം ആദ്മി പാർട്ടി നേതാവ് മനീഷ് സിസോദിയ. ഇഡി രജിസ്റ്റർ ചെയ്ത കേസുകളിൽ 95 ശതമാനവും വ്യാജമാണെന്നും, കേരളത്തിൽ അടിത്തറയുണ്ടാക്കാൻ ബിജെപി ആശ്രയിക്കുന്നത് ഇഡിയെയും തെരഞ്ഞെടുപ്പ് കമ്മീഷനെയുമാണെന്നും സിപിഐഎം സംഘടിപ്പിച്ച സെമിനാറിൽ സംസാരിക്കവെ അദ്ദേഹം പറഞ്ഞു.
ഇഡി ഒരു തെരഞ്ഞെടുപ്പ് കലണ്ടർ തന്നെ തയ്യാറാക്കിയിട്ടുണ്ടെന്നും ബിജെപി ഇതര സർക്കാരുകളുടെ ജനക്ഷേമ പദ്ധതികൾ അനാവശ്യ കേസുകളിൽ കുരുക്കി തടസ്സപ്പെടുത്തുകയാണെന്നും സിസോദിയ ആരോപിച്ചു. ആം ആദ്മി പാർട്ടി നടപ്പിലാക്കിയ പ്രവർത്തനങ്ങൾ ഇത്തരത്തിൽ നിർത്തിവെപ്പിച്ച അനുഭവം ചൂണ്ടിക്കാട്ടിയ അദ്ദേഹം, കേരളത്തിലും സമാനമായ നീക്കങ്ങൾ നടക്കുമെന്ന കാര്യം അവിടുത്തെ ജനങ്ങളെ ബോധ്യപ്പെടുത്തണമെന്നും വ്യക്തമാക്കി.
കോൺഗ്രസിന്റെ പരാതിയിൽ ബിജെപി തനിക്കെതിരെ അന്വേഷണ ഏജൻസികളെ തിരിച്ചുവിട്ടപ്പോൾ വീട്ടുസാധനങ്ങളും മകന്റെ പുസ്തകങ്ങളും വരെ ഉദ്യോഗസ്ഥർ വാരിവലിച്ചിട്ട് പരിശോധിച്ചതായി സിസോദിയ ഓർമ്മിപ്പിച്ചു. 18 മാസം നീണ്ട ജയിൽവാസത്തിനിടെ കുടുംബത്തോട് സംസാരിക്കാൻ പോലും അനുവദിച്ചില്ലെന്നും, ബിജെപിയിലേക്ക് എത്ര എംഎൽഎമാരെ കൊണ്ടുവരുമെന്ന് ഉദ്യോഗസ്ഥർ ചോദിച്ചതായും ഡൽഹി ഗവർണർ നേരിട്ടെത്തി പാർട്ടി മാറ്റത്തിന് പ്രേരിപ്പിച്ചതായും അദ്ദേഹം വെളിപ്പെടുത്തി.
