പട്‌ന: ബിഹാറിലെ ഹാജിപൂരിൽ രാംപൂർ ശ്യാംചന്ദ് ഗ്രാമത്തിനടുത്ത് ഗംഗാ നദിയിൽ ബോട്ട് മറിഞ്ഞുണ്ടായ ദുരന്തത്തിൽ മരണസംഖ്യ 14 ആയി ഉയർന്നു. മരിച്ചവരിൽ ഭൂരിഭാഗവും കുട്ടികളാണ്; ഇന്നലെ രാത്രി ഒരു ആഘോഷ പരിപാടിയിൽ പങ്കെടുത്ത ശേഷം മടങ്ങുകയായിരുന്ന സംഘമാണ് അപകടത്തിൽപ്പെട്ടത്.
സംഭവം നടന്നയുടൻ സമീപവാസികളായ നാട്ടുകാരാണ് പ്രാഥമിക രക്ഷാപ്രവർത്തനം നടത്തിയത്, തുടർന്ന് എൻഡിആർഎഫ് ഉൾപ്പെടെയുള്ള സേനകൾ തിരച്ചിലിനെത്തി. അപകടത്തിൽപ്പെട്ട പത്തോളം പേരെ രക്ഷപ്പെടുത്തിയതിൽ ആറ് പേർ നിലവിൽ ആശുപത്രിയിൽ ചികിത്സയിലാണെന്ന് പോലീസ് വ്യക്തമാക്കി.
ദുരന്തത്തിൽ ജീവൻ നഷ്ടപ്പെട്ടവരുടെ ആശ്രിതർക്ക് സംസ്ഥാന സർക്കാർ നാല് ലക്ഷം രൂപ വീതവും പ്രധാനമന്ത്രി നരേന്ദ്ര മോദി രണ്ട് ലക്ഷം രൂപ വീതവും ധനസഹായം പ്രഖ്യാപിച്ചു. പരിക്കേറ്റവർക്ക് 50,000 രൂപ വീതവും നൽകും.
