തമിഴ്‌നാടിന്റെ സെറ്റിൽമെന്റിന് ശേഷമുള്ള യഥാർത്ഥ ജിഎസ്ടി വരുമാനത്തിൽ 16.1 ശതമാനം വളർച്ച രേഖപ്പെടുത്തിയതായി തമിഴക വെട്രി കഴകം (ടിവികെ). ജിഎസ്ടി വരുമാനത്തിൽ ഇടിവുണ്ടായെന്ന പ്രതിപക്ഷമായ ഡിഎംകെയുടെ പ്രചാരണം അപൂർണ്ണമായ വിവരങ്ങൾ നിരത്തി ജനങ്ങളെ തെറ്റിദ്ധരിപ്പിക്കാനാണെന്നും പാർട്ടി കുറ്റപ്പെടുത്തി.
ജിഎസ്ടി വരുമാനത്തിൽ 5 ശതമാനം ഇടിവുണ്ടെന്ന ഡിഎംകെയുടെ ആരോപണങ്ങൾ തള്ളിക്കളയുന്നതാണ് സംസ്ഥാന സർക്കാരിന്റെ പുതിയ വിശദീകരണമെന്ന് ടിവികെ ഐടി വിംഗ് എക്സിൽ പങ്കുവെച്ച കുറിപ്പിൽ വ്യക്തമാക്കി. തമിഴ്‌നാടിന്റെ പോസ്റ്റ്-സെറ്റിൽമെന്റ് ജിഎസ്ടി വരുമാനത്തിൽ 16.1 ശതമാനം വർധനവുണ്ടായിട്ടുണ്ടെന്ന് ധനകാര്യ സെക്രട്ടറി തന്നെ സ്ഥിരീകരിച്ചിട്ടുണ്ടെന്നും പാർട്ടി ചൂണ്ടിക്കാട്ടി.
ഉൽപ്പാദന-വിതരണ കേന്ദ്രമായ തമിഴ്നാട് പോലുള്ള സംസ്ഥാനങ്ങളിൽ ഇന്റഗ്രേറ്റഡ് ജിഎസ്ടി (ഐജിഎസ്ടി) സെറ്റിൽമെന്റുകൾ മൊത്തം വരുമാനക്കണക്കുകളെ കാര്യമായി സ്വാധീനിക്കുമെന്നും, അതിനാൽ സെറ്റിൽമെന്റിന് ശേഷമുള്ള കണക്കുകളാണ് സാമ്പത്തിക സ്ഥിതി വിലയിരുത്താൻ ഉപയോഗിക്കേണ്ടതെന്നും ടിവികെ വ്യക്തമാക്കി. സാമ്പത്തിക മാന്ദ്യവും ഭരണപരാജയവും വരുത്തിത്തീർക്കാൻ ഗ്രോസ് ജിഎസ്ടി കണക്കുകൾ മാത്രം കാണിച്ച് രാഷ്ട്രീയ വിരോധം തീർക്കാനാണ് ഡിഎംകെ ശ്രമിക്കുന്നതെന്നും ടിവികെ ആരോപിച്ചു.
