ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് തുടർച്ചയായ നാലാം ദിവസവും രാജ്യതലസ്ഥാനത്ത് പ്രതിഷേധം ശക്തമാക്കാൻ ഇന്ത്യാ സഖ്യം. രാഷ്ട്രപതിയെ നേരിൽക്കണ്ട് പരാതി നൽകാൻ അനുമതി തേടിയെങ്കിലും മറുപടി ലഭിക്കാത്തതിനെ തുടർന്നാണ് രാഷ്ട്രപതി ഭവനിലേക്ക് മാർച്ച് നടത്താൻ പ്രതിപക്ഷം തീരുമാനിച്ചത്. പ്രതിഷേധ സാധ്യതകൾ കണക്കിലെടുത്ത് ഡൽഹിയിൽ അതീവ സുരക്ഷ ഏർപ്പെടുത്തിയിട്ടുണ്ട്.
ഗ്യാനേഷ് കുമാറിനെതിരായ ഗുരുതര ആരോപണങ്ങൾ അടങ്ങിയ നിവേദനം രാഷ്ട്രപതിക്ക് സമർപ്പിക്കാനാണ് പ്രതിപക്ഷത്തിന്റെ നീക്കം. സന്ദർശനാനുമതി ലഭിക്കുകയാണെങ്കിൽ ലോക്സഭാ പ്രതിപക്ഷ നേതാവ് രാഹുൽ ഗാന്ധിയുടെ നേതൃത്വത്തിലുള്ള 10 നേതാക്കളുടെ സംഘം രാഷ്ട്രപതിയെ കാണും.
അനുമതി ലഭിച്ചില്ലെങ്കിൽ ഉച്ചയ്ക്ക് ശേഷം പാർലമെന്റ് സെൻട്രൽ ഹാളിൽ ഒത്തുകൂടാൻ എംപിമാർക്ക് നിർദ്ദേശം നൽകിയിട്ടുണ്ട്. തുടർന്ന് വൈകിട്ട് മൂന്ന് മണിയോടെ സെൻട്രൽ ഹാളിൽ നിന്ന് രാഷ്ട്രപതി ഭവനിലേക്ക് മാർച്ച് ആരംഭിക്കും.
