മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ന്യൂഡൽഹിയിൽ സമരം ചെയ്തതിന് പിന്നാലെ കോൺഗ്രസ് നേതാവ് രാഹുൽ ഗാന്ധി ഉൾപ്പെടെയുള്ള ഇന്ത്യാ മുന്നണി നേതാക്കളെ അറസ്റ്റ് ചെയ്ത സംഭവത്തിൽ, കേന്ദ്രത്തിലെ ബിജെപി സർക്കാരിന്റെ പേര് പറയാതെ പ്രതികരിച്ച മുഖ്യമന്ത്രി ജോസഫ് വിജയിന്റെ പാർട്ടിയായ ടിവികെയ്ക്കെതിരെ ഡിഎംകെ. പ്രതിപക്ഷ നേതാവിനെതിരായ നടപടിക്ക് ഉത്തരവാദികൾ ആരാണെന്ന് വ്യക്തമാക്കാത്ത ടിവികെയുടെ പ്രസ്താവന അപൂർണ്ണമാണെന്നും, കേന്ദ്രം ഭരിക്കുന്ന പാർട്ടിയുടെ പേര് തുറന്നുപറയാൻ ടിവികെയ്ക്ക് ധൈര്യമില്ലെന്നും ഡിഎംകെ വക്താവ് ടി.കെ.എസ്. ഇളങ്കോവൻ പിടിഐ വീഡിയോസിനോട് പറഞ്ഞു.
ഒക്ടോബർ 6-ന് നടന്ന അറസ്റ്റിന് പിന്നാലെ, പ്രതിപക്ഷ നേതാവിനെയും മറ്റ് എംപിമാരെയും കസ്റ്റഡിയിലെടുത്ത രീതി തികച്ചും ആക്ഷേപകരമാണെന്നും ഇത്തരം കടുത്ത നടപടികൾ ഒഴിവാക്കണമെന്നും ചൂണ്ടിക്കാട്ടി ടിവികെ സോഷ്യൽ മീഡിയയിൽ കുറിപ്പ് പങ്കുവെച്ചിരുന്നു. തെരഞ്ഞെടുപ്പ് കമ്മീഷന്റെ നിഷ്പക്ഷതയില്ലായ്മയ്ക്കെതിരെ സംസാരിക്കാൻ സിഇസിയെ കാണാൻ പോകുന്നതിനിടെ ബിജെപിയുടെ നിയന്ത്രണത്തിലുള്ള ഡൽഹി പോലീസാണ് രാഹുൽ ഗാന്ധിയെ തടഞ്ഞതെന്നും, എന്നിട്ടും ബിജെപിയെ കുറ്റപ്പെടുത്താൻ ടിവികെ തയ്യാറാകുന്നില്ലെന്നും ഇളങ്കോവൻ കുറ്റപ്പെടുത്തി. ഒക്ടോബർ 10-ന് ചെന്നൈയിലെത്തുന്ന രാഹുൽ ഗാന്ധി മുഖ്യമന്ത്രി വിജയ്ക്കൊപ്പം വേദി പങ്കിടുമെന്ന റിപ്പോർട്ടുകളിൽ പ്രതികരിക്കാൻ അദ്ദേഹം തയ്യാറായില്ല.
ഇതിനുപുറമെ തമിഴ്നാട്ടിലെ ഭരണപരാജയങ്ങൾ എണ്ണിപ്പറഞ്ഞും ഡിഎംകെ രംഗത്തെത്തി. റെഡ് ഹിൽസിലും ചെന്നൈ കോർപ്പറേഷനിലും സബ് സ്റ്റേഷനുകൾ ഉണ്ടായിട്ടും മുഖ്യമന്ത്രിയുടെ മണ്ഡലമായ പെരമ്പൂരിൽ രൂക്ഷമായ വൈദ്യുതി മുടക്കമുണ്ടെന്ന് അദ്ദേഹം ആരോപിച്ചു. ജൂൺ 12-ന് കുറുവായ് നെൽകൃഷിക്ക് വെള്ളം തുറന്നുവിടാത്തതിനാൽ വിളവ് പൂർണ്ണമായി നശിക്കുകയും അരിവില വർധിക്കുകയും ചെയ്തുവെന്നും, തിരുവൊട്ടിയൂരിലും ദിണ്ടിഗലിലും നടന്ന കൊലപാതകങ്ങൾ ചൂണ്ടിക്കാട്ടി സംസ്ഥാനത്ത് ക്രമസമാധാനം ഏറ്റവും മോശം അവസ്ഥയിലാണെന്നും ഇളങ്കോവൻ വ്യക്തമാക്കി.
