ഡെറാഡൂൺ: മോഷണം പോയ സ്വന്തം ഐഫോൺ തുറക്കാനായി പാസ്‌വേഡ് ആവശ്യപ്പെട്ട് കള്ളൻ വാട്‌സ്ആപ്പിലും എസ്എംഎസിലും സന്ദേശമയച്ചതായി ഉത്തരാഖണ്ഡ് സ്വദേശിയായ യുവതിയുടെ വെളിപ്പെടുത്തൽ. കഴിഞ്ഞ സെപ്റ്റംബർ 12-ന് ക്ലെമന്റ് ടൗണിൽ വെച്ചാണ് കൗശികി ധ്യാനി എന്ന യുവതിയുടെ ഐഫോണും സുഹൃത്തിന്റെ സഹോദരൻ സാക്ഷം നേഗിയുടേതടക്കമുള്ള മറ്റ് ഫോണുകളും മോഷണം പോയത്. ഫോൺ സ്ക്രീനിൽ കോൺടാക്ട് നമ്പർ കാണാൻ സാധിച്ചിരുന്നതിനാലാണ് മോഷ്ടാവിന് തന്നെ നേരിട്ട് ബന്ധപ്പെടാൻ കഴിഞ്ഞതെന്നാണ് യുവതി വ്യക്തമാക്കുന്നത്.

പ്രദേശത്തെ വീടുകളിൽ നിന്നും ഹോസ്റ്റലുകളിൽ നിന്നും മാക്ബുക്കുകളും ലാപ്‌ടോപ്പുകളും മൊബൈൽ ഫോണുകളും ഉൾപ്പെടെ ലക്ഷക്കണക്കിന് രൂപയുടെ സാധനങ്ങൾ കവർച്ച ചെയ്യപ്പെട്ടിട്ടും പോലീസ് ഗൗരവമായി അന്വേഷിച്ചില്ലെന്ന് കൗശികി കുറ്റപ്പെടുത്തി. പല തവണ സ്റ്റേഷൻ കയറിയിറങ്ങിയിട്ടും പരാതി സ്വീകരിക്കാൻ പോലും ഉദ്യോഗസ്ഥർ തയ്യാറായില്ലെന്നും, സ്റ്റേഷനിൽ ആളില്ലെന്നും പിന്നീട് വരണമെന്നും പറഞ്ഞ് മടക്കി അയച്ചതായും അവർ ആരോപിച്ചു.

പോലീസിനെ തെല്ലും ഭയമില്ലാത്ത സ്ഥിതിയിലാണ് പ്രദേശത്ത് മോഷ്ടാക്കൾ വിലസുന്നതെന്നും, അവരെ പിടികൂടാൻ ഉത്തരാഖണ്ഡ് പോലീസിന് കഴിയില്ലെന്ന് കള്ളന്മാർക്ക് നന്നായി അറിയാമെന്നും യുവതി സമൂഹമാധ്യമത്തിലൂടെ വിമർശിച്ചു.