ന്യൂഡൽഹി: വോട്ടർപട്ടിക പരിഷ്കരണത്തിലെ അപാകതകളും "വോട്ടുചോർച്ച" ആരോപണങ്ങളും ഉന്നയിച്ച് മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനും തെരഞ്ഞെടുപ്പ് കമ്മീഷനുമെതിരായ പ്രക്ഷോഭം പ്രതിപക്ഷ പാർട്ടികൾ ശക്തമാക്കുന്നു. സമരപരിപാടികൾ കൂടുതൽ വ്യാപിപ്പിക്കുന്നതിന്റെ ഭാഗമായി രാഹുൽ ഗാന്ധി ജനപഥിൽ സംഘടിപ്പിച്ച പ്രതിപക്ഷ നേതാക്കളുടെ വിരുന്നിൽ പങ്കെടുത്തു.
പാർലമെന്റിൽ നിന്ന് തെരഞ്ഞെടുപ്പ് കമ്മീഷൻ ആസ്ഥാനത്തേക്ക് മാർച്ച് നടത്തുകയും കമ്മീഷനുമായി കൂടിക്കാഴ്ച ആവശ്യപ്പെട്ട് മണിക്കൂറുകളോളം കുത്തിയിരുന്ന് സമരം നടത്തുകയും ചെയ്ത രാഹുൽ ഗാന്ധി, പ്രിയങ്ക ഗാന്ധി വാദ്ര, മറ്റ് 'ഇന്ത്യ' മുന്നണി നേതാക്കൾ എന്നിവരെ പോലീസ് കസ്റ്റഡിയിലെടുത്തതിന് തൊട്ടടുത്ത ദിവസമാണ് പുതിയ നീക്കം.
ബുധനാഴ്ച ഉച്ചയ്ക്ക് ഒരു മണിക്ക് കശ്മീരി ഗേറ്റിലുള്ള ഡൽഹി ചീഫ് ഇലക്ടറൽ ഓഫീസറുടെ (സിഇഒ) ഓഫീസിന് മുന്നിൽ ആം ആദ്മി പാർട്ടി, കോൺഗ്രസ്, ഇടതുകക്ഷികൾ എന്നിവരുൾപ്പെടുന്ന സംയുക്ത പ്രതിപക്ഷ സംഘടനകൾ വൻ പ്രതിഷേധം സംഘടിപ്പിക്കും. പാർട്ടി പ്രവർത്തകരും അനുഭാവികളും സമരത്തിൽ വൻതോതിൽ പങ്കെടുക്കണമെന്ന് ആം ആദ്മി പാർട്ടി ഡൽഹി അധ്യക്ഷൻ സൗരഭ് ഭരദ്വാജ് ആഹ്വാനം ചെയ്തിട്ടുണ്ട്.
