ന്യൂഡൽഹി: രാഹുൽ ഗാന്ധിയുടെയും മറ്റ് പ്രതിപക്ഷ നേതാക്കളുടെയും നേതൃത്വത്തിൽ തെരഞ്ഞെടുപ്പ് കമ്മീഷനെതിരെ നടന്ന സമരം ചരിത്രപരമായ ഒരു സുപ്രധാന ദിനമായി അടയാളപ്പെടുത്തപ്പെടുമെന്ന് കോൺഗ്രസ് നേതാവ് ഉദിത് രാജ്. വിവാദ വിഷയങ്ങൾ രാജ്യത്തിന് മുന്നിൽ ധീരമായി തുറന്നുകാട്ടാൻ പ്രതിപക്ഷത്തിന് കഴിഞ്ഞെന്നും, ഈ പോരാട്ടം രാജ്യവ്യാപകമായ വൻ ജനകീയ പ്രക്ഷോഭത്തിന് വഴിയൊരുക്കുമെന്നും അദ്ദേഹം വ്യക്തമാക്കി.
രാഹുൽ ഗാന്ധിയുടെ ആഹ്വാനം ഉൾക്കൊണ്ട് കഴിഞ്ഞ ദിവസം പതിനായിരക്കണക്കിന് ആളുകളാണ് പ്രതിഷേധത്തിനായി ഒത്തുചേർന്നതെന്ന് ഉദിത് രാജ് ചൂണ്ടിക്കാട്ടി. ഇതിന്റെ തുടർച്ചയായി വരുംദിവസങ്ങളിൽ രാജ്യത്തിന്റെ വിവിധ ഭാഗങ്ങളിൽ കൂടുതൽ സമരപരിപാടികൾ ആസൂത്രണം ചെയ്തിട്ടുണ്ടെന്നും വാർത്താ ഏജൻസിയായ എഎൻഐയോട് സംസാരിക്കവെ അദ്ദേഹം പറഞ്ഞു.
