ന്യൂഡൽഹി: മുഖ്യമന്ത്രി വി.ഡി. സതീശന്റെ പ്രവർത്തനരീതികൾക്കെതിരെ കോൺഗ്രസിൽ അതൃപ്തി പുകയുന്നതിനിടെ, ഭരണകാര്യങ്ങളിൽ കൂടിയാലോചനകൾ അനിവാര്യമാണെന്ന നിലപാടുമായി മുൻ കെപിസിസി അധ്യക്ഷൻ കെ. സുധാകരൻ. സർക്കാർ പ്രവർത്തനങ്ങളിൽ തിരുത്തൽ വേണമെന്നാണ് പൊതുവികാരമെന്നും, സംസ്ഥാനത്തെ പ്രമുഖ നേതാവായ അടൂർ പ്രകാശ് ഒരിക്കലും കളവ് പറയില്ലെന്നും അദ്ദേഹത്തിന്റെ പരാതിയിൽ കഴമ്പുണ്ടെന്ന് തന്നെയാണ് വിശ്വാസമെന്നും സുധാകരൻ വ്യക്തമാക്കി.
പാർട്ടിക്കാണ് പ്രഥമ പരിഗണനയെന്നും അതിനുശേഷമേ മറ്റ് രാഷ്ട്രീയ വിഷയങ്ങൾ വരുന്നുള്ളൂവെന്നും സുധാകരൻ ചൂണ്ടിക്കാട്ടി. അടൂർ പ്രകാശ് ഉന്നയിച്ച പ്രശ്നങ്ങൾക്ക് എത്രയും വേഗം പരിഹാരം കാണണമെന്നും നിലവിൽ നേതാക്കളെല്ലാം അതിനായുള്ള സമവായ ചർച്ചകളിൽ സജീവമായി ഇടപെടുന്നുണ്ടെന്നും അദ്ദേഹം പറഞ്ഞു.
റിപ്പോർട്ടർ ചാനലിന് നൽകിയ അഭിമുഖത്തിലാണ് അദ്ദേഹം തന്റെ നിലപാട് വ്യക്തമാക്കിയത് .
യുഡിഎഫ് ചെയർമാൻ കൂടിയായ മുഖ്യമന്ത്രി വി.ഡി. സതീശൻ ഭരണതലത്തിൽ യാതൊരുവിധ കൂടിയാലോചനകളും നടത്തുന്നില്ലെന്ന ആക്ഷേപം അടൂർ പ്രകാശ് നേരത്തെ പരസ്യമായി ഉന്നയിച്ചിരുന്നു.
