ന്യൂഡൽഹി: വിദേശ സാമ്പത്തിക ഇടപാടുകളുമായി ബന്ധപ്പെട്ട് എക്സാലോജിക് എം.ഡിയും പ്രതിപക്ഷ നേതാവ് പിണറായി വിജയന്റെ മകളുമായ വീണ ടിയെ ചോദ്യം ചെയ്യാനുള്ള എൻഫോഴ്സ്മെന്റ് ഡയറക്ടറേറ്റിന്റെ (ഇ.ഡി) നീക്കത്തിനെതിരെ കടുത്ത വിമർശനവുമായി ജോൺ ബ്രിട്ടാസ് എം.പി. വീണയ്ക്ക് നേരെയുള്ള അന്വേഷണം തികഞ്ഞ രാഷ്ട്രീയ പകപോക്കലാണെന്ന് അദ്ദേഹം പ്രതികരിച്ചു. ബി.ജെ.പിയുടെ തെരഞ്ഞെടുപ്പ് ഫണ്ട് തിരിമറിയിൽ ഇ.ഡി അന്വേഷണം നടത്തിയോ എന്ന് ചോദിച്ച അദ്ദേഹം, സി.എം.ആർ.എൽ പല രാഷ്ട്രീയ നേതാക്കൾക്കും പണം നൽകിയതിൽ അന്വേഷണം ഉണ്ടായിട്ടുണ്ടോ എന്നും ആരാഞ്ഞു. മുഹമ്മദ് റിയാസിനെതിരെയുള്ള ആക്ഷേപങ്ങളും സമാനമായ രാഷ്ട്രീയ പ്രതികാരത്തിന്റെ തുടർച്ചയാണെന്ന് ജോൺ ബ്രിട്ടാസ് പറഞ്ഞു.
പി.എം കെയേഴ്സ് ഫണ്ട് വിനിയോഗിച്ചതും പ്രധാനമന്ത്രി പാർലമെന്റിൽ ചെലവഴിച്ച സമയവും തമ്മിൽ സാമ്യമുണ്ടെന്ന് എം.പി പരിഹസിച്ചു. വെറും 0.02 ശതമാനമാണ് ആ സമയമെന്നും അദ്ദേഹം വ്യക്തമാക്കി. പി.എം കെയേഴ്സ് ഫണ്ട് ഒരു സ്വകാര്യ ഫണ്ടാണെന്ന സർക്കാരിന്റെ നിലപാട് തന്നെ വലിയൊരു അട്ടിമറിയും കുംഭകോണവുമാണ്. ഫണ്ടിന്റെ കാര്യത്തിൽ പൂർണ്ണ സുതാര്യതയും പാർലമെന്റിന്റെ സൂക്ഷ്മ പരിശോധനയും ഉറപ്പാക്കേണ്ടതുണ്ടെന്നും വിഷയത്തിൽ പ്രധാനമന്ത്രി രാജ്യത്തോട് മറുപടി പറയണമെന്നും അദ്ദേഹം ആവശ്യപ്പെട്ടു.
ബജറ്റ് ഫണ്ട് ചെലവഴിക്കുന്നത് സംബന്ധിച്ച് കൃത്യമായ അവലോകനങ്ങൾ നടക്കുന്നില്ലെന്ന് കുറ്റപ്പെടുത്തിയ എം.പി, സെൻസസിന്റെ മറപിടിച്ച് എൻ.പി.ആർ (NPR) നടപ്പിലാക്കാനാണ് അധികൃതർ ശ്രമിക്കുന്നതെന്നും ഈ സെൻസസിൽ നിരവധി ആശങ്കാജനകമായ കാര്യങ്ങൾ ഉൾപ്പെട്ടിട്ടുണ്ടെന്നും ആരോപിച്ചു.
