ന്യൂഡൽഹി: ഡൽഹിയിലെ കേരള ഹൗസിൽ സംഘടിപ്പിച്ച ഓണാഘോഷ പരിപാടിക്കിടെ സി.പി.ഐ.എം കേന്ദ്ര കമ്മിറ്റി അംഗം പി.കെ. ശ്രീമതിയെ വേദിയിലേക്ക് വിളിച്ച് ഇരുത്തി മുഖ്യമന്ത്രി വി.ഡി. സതീശൻ. ആഭ്യന്തര മന്ത്രി രമേശ് ചെന്നിത്തല, ഹാരിസ് ബീരാൻ എം.പി, വി. മുരളീധരൻ എം.എൽ.എ തുടങ്ങിയ നേതാക്കൾ സന്നിഹിതരായിരുന്ന ചടങ്ങിലാണ് വേറിട്ട ഈ കാഴ്ച അരങ്ങേറിയത്. പരിപാടി ഉദ്ഘാടനം ചെയ്ത് പ്രസംഗിക്കുന്നതിനിടയിലാണ് സദസ്സിൽ മുൻ മന്ത്രി കൂടിയായ പി.കെ. ശ്രീമതി ഇരിക്കുന്നത് മുഖ്യമന്ത്രിയുടെ ശ്രദ്ധയിൽപ്പെട്ടത്.
എല്ലാവർക്കും സന്തോഷവും ഐശ്വര്യവും ആഹ്ലാദവും നിറഞ്ഞ ഊഷ്മളമായ ഓണാശംസകൾ നേർന്നു സംസാരിച്ചു തുടങ്ങിയ മുഖ്യമന്ത്രി, 'ശ്രീമതി ടീച്ചർ കൂടിയുണ്ട്, വാ വാ ടീച്ചർ കൂടി വാ, സ്റ്റേജിലേക്ക് ഇരിക്കൂ' എന്ന് നേരിട്ട് ക്ഷണിച്ചാണ് അവരെ വേദിയിലേക്ക് സ്വീകരിച്ചത്. ഉത്സവകാലത്ത് വിപണിയിൽ വിലക്കയറ്റം ഉണ്ടാകാതെ നോക്കുക എന്നത് സർക്കാരിന് വലിയൊരു വെല്ലുവിളിയാണെന്ന് അദ്ദേഹം ചൂണ്ടിക്കാട്ടി. സപ്ലൈകോയും ഓണച്ചന്തകളും മികച്ച രീതിയിലാണ് പ്രവർത്തിക്കുന്നത്. ജീവനക്കാർക്ക് നൽകാനുള്ള ക്ഷാമബത്തയും മറ്റ് കുടിശ്ശികകളും പൂർണ്ണമായി വിതരണം ചെയ്യാൻ കഴിഞ്ഞതിൽ വലിയ സന്തോഷമുണ്ടെന്നും വി.ഡി. സതീശൻ കൂട്ടിച്ചേർത്തു.
അതേസമയം, തനിക്ക് ഇത്തവണത്തേത് 'തൂഫാൻ ഓണം' ആയിരുന്നുവെന്നും അങ്ങനെ ആഘോഷിക്കാനാണ് തീരുമാനമെന്നും ആഭ്യന്തര മന്ത്രി രമേശ് ചെന്നിത്തല പ്രതികരിച്ചു. താനുൾപ്പെടെയുള്ളവർ ഓണാട്ടുകരക്കാരാണെന്നും മറ്റുള്ളവർക്ക് ഓണമുണ്ണാൻ അവസരമൊരുക്കാൻ ആഗ്രഹിക്കുന്നവരാണ് തങ്ങളെന്നും മന്ത്രി പറഞ്ഞു.
