ഹൈദരാബാദ്: ആന്ധ്രാപ്രദേശിൽ നിന്നുള്ള രാജ്യസഭാ എം.പിയുടെ മകൻ ഓടിച്ച ആഡംബര വാഹനം ഇടിച്ച് യുവതിക്ക് ദാരുണാന്ത്യം. ഇനോർബിറ്റ് മാളിലെ വസ്ത്രവ്യാപാര സ്ഥാപനത്തിലെ ജീവനക്കാരിയായ ഭാരതി മുഖി (26) ആണ് അപകടത്തിൽ മരണപ്പെട്ടത്. കഴിഞ്ഞ ഓഗസ്റ്റ് 16-നായിരുന്നു ഹൈദരാബാദിൽ ഈ ദാരുണ സംഭവം അരങ്ങേറിയത്. ആന്ധ്രാപ്രദേശ് ഉപമുഖ്യമന്ത്രി പവൻ കല്യാണിന്റെ പാർട്ടിയായ ജനസേനയുടെ രാജ്യസഭാംഗവും വ്യവസായിയുമായ ലിംഗമാനേനി രമേഷിന്റെ (എൽ. രമേഷ്) മകൻ ലിംഗമാനേനി സഞ്ജൂഷ് ഓടിച്ച കാറാണ് അപകടമുണ്ടാക്കിയത്.
മധപുരിയിൽ ജോലിസ്ഥലത്തേക്ക് പോകുന്നതിനായി റോഡ് മുറിച്ചുകടക്കുന്നതിനിടെയാണ് ഭാരതിയെ കാറിടിക്കുന്നത്. സഞ്ജൂഷ് അമിതവേഗതയിലാണ് കാറോടിച്ചിരുന്നതെന്ന് പോലീസ് വ്യക്തമാക്കി. വാഹനമോടിച്ചത് സഞ്ജൂഷ് തന്നെയാണെന്ന് പോലീസ് കണ്ടെത്തിയെങ്കിലും, ഇയാളെ ഇതുവരെ അറസ്റ്റ് ചെയ്യാൻ പോലീസ് തയ്യാറായിട്ടില്ല.
