മുംബൈ: ഉത്സവ സീസണോടനുബന്ധിച്ച് മഹാരാഷ്ട്ര ഫുഡ് ആൻഡ് ഡ്രഗ് അഡ്മിനിസ്ട്രേഷൻ (എഫ്ഡിഎ) നടത്തിയ സംസ്ഥാനവ്യാപക പരിശോധനയിൽ പതഞ്ജലി ആയുർവേദത്തിന്റെ സൂപ്പർ ഡിസ്ട്രിബ്യൂട്ടർ ഉൾപ്പെടെ 19 ഭക്ഷ്യ സ്ഥാപനങ്ങളുടെ ലൈസൻസുകൾ സസ്‌പെൻഡ് ചെയ്തു. സംസ്ഥാനത്തെ ഏഴ് ഡിവിഷനുകളിലെ 114 കേന്ദ്രങ്ങളിൽ നിന്നായി 9.01 കോടി രൂപ വിലമതിക്കുന്ന 3.53 ലക്ഷം കിലോഗ്രാം ഭക്ഷ്യസാധനങ്ങൾ അധികൃതർ പിടിച്ചെടുത്തു. നിർമ്മാണ കേന്ദ്രങ്ങളിലെ ഗുരുതരമായ ശുചിത്വക്കുറവും ഭക്ഷ്യസുരക്ഷാ ചട്ടലംഘനങ്ങളും മുൻനിർത്തി മുംബൈ, അമരാവതി, ഛത്രപതി സംഭാജിനഗർ ഡിവിഷനുകളിലെ മധുരപലഹാരങ്ങൾ, നംകീൻ, സുഗന്ധവ്യഞ്ജനങ്ങൾ എന്നിവ വിപണനം ചെയ്യുന്ന സ്ഥാപനങ്ങൾക്കെതിരെയാണ് നടപടി.
ഛത്രപതി സംഭാജിനഗറിലുള്ള പതഞ്ജലിയുടെ സൂപ്പർ ഡിസ്ട്രിബ്യൂട്ടറായ ദിവ്യ മഹാവിതർക്കിൽ നിന്ന് മായം ചേർത്തെന്ന സംശയത്തെയും തെറ്റായ ബ്രാൻഡിംഗിനെയും തുടർന്ന് 20.20 ലക്ഷം രൂപ വിലവരുന്ന 2,279.7 ലിറ്റർ പശുനെയ്യ് പിടിച്ചെടുത്തു. താനെ ഭിവണ്ടിയിലെ അവന്യൂ സൂപ്പർമാർട്ട്സ് ലിമിറ്റഡിൽ നിന്ന് 1,44,218 കിലോഗ്രാം ഭക്ഷ്യ എണ്ണയും, സത്താറയിലെ അമിൻ ട്രേഡേഴ്സിൽ നിന്ന് 20,560 കിലോഗ്രാം അരി, പയറുവർഗ്ഗങ്ങൾ, ശർക്കര എന്നിവയും കസ്റ്റഡിയിലെടുത്തു. പൂനെ ഡിവിഷന് കീഴിലുള്ള സത്താറ സ്വാതി ഓയിൽ മിൽസ്, സോളാപൂർ എസ് ജി ട്രേഡേഴ്സ് എന്നിവിടങ്ങളിൽ നിന്നും ഭക്ഷ്യ എണ്ണ ശേഖരം പിടികൂടിയിട്ടുണ്ട്.
ഒക്ടോബർ 28 മുതൽ 31 വരെയുള്ള ദിവസങ്ങളിൽ 17 കേന്ദ്രങ്ങളിൽ നിന്നായി 79.40 ലക്ഷം രൂപയുടെ നിരോധിത ഭക്ഷ്യവസ്തുക്കൾ പിടിച്ചെടുത്തതായും എഫ്ഡിഎ പ്രസ്താവനയിൽ വ്യക്തമാക്കി. നിയമലംഘനങ്ങളുമായി ബന്ധപ്പെട്ട് 13 എഫ്ഐആറുകൾ രജിസ്റ്റർ ചെയ്യുകയും 16 പേരെ അറസ്റ്റ് ചെയ്യുകയും ചെയ്തു; കൂടാതെ ഏഴ് സ്ഥാപനങ്ങൾ പൂട്ടി മുദ്രവെക്കുകയും ആറ് വാഹനങ്ങൾ പിടിച്ചെടുക്കുകയും ചെയ്തിട്ടുണ്ട്.
